आगामी वर्षको बजेट लेख्न अर्थ मन्त्रालयले बनायो समिति

१६ चैत, काठमाडौं । अर्थ मन्त्रालयले सहसचिव धनीराम शर्माको संयोजकत्वमा बजेट लेखन समिति बनाएको छ । अर्थमन्त्री वर्षमान पुनले कर्मचारी अदलबदल गरी बजेट लेखन मस्यौदा समिति बनाएका हुन् । आर्थिक वर्ष २०८१–८२ को बजेट वक्तव्य लेखनका लागि शुक्रबार समिति गठन भएको हो । 

सहसचिव धनीराम शर्माको संयोजकत्वमा गठित समितिमा सहसचिवहरु रितेशकुमार शाक्य, महेश आचार्य, रामप्रसाद आचार्य, ईश्वरी अर्याल र पार्वती शर्मा सदस्य रहेका छन् । शर्मा, शाक्य, आचार्यद्वय र अर्याल अर्थ मन्त्रालयमै थिए भने शर्मा आन्तरिक राजश्व कार्यालयमा उपमहानिर्देशक छन् । 

समिति संयोजक शर्माले शनिबार नै बैठक बसेर समितिले काम थाल्ने जानकारी दिए । विषयगत मन्त्रालयहरुसँग समन्वय गरेर तत्काल बजेट लेखनको काम थालिने शर्माको भनाइ थियो ।