अखिल नेपाल फुटबल संघका उपाध्यक्ष दावा लामा पक्राउ

५ वैशाख, काठमाडौं । नेपाल प्रहरीको अपराध अनुसन्धानमा खटिएको टोलीले अखिल नेपाल फुटबल संघ (एन्फा) का उपाध्यक्ष दावा लामा पक्राउ गरेको छ । लामालाई काठमाडौं उपत्यका अपराध अनुसन्धान कार्यालयको टोलीले पक्राउ गरेको हो । 

काठमाडौं उपत्यका प्रहरी कार्यालयका एआईजी दीपक थापाले दिएको जानकारी अनुसार दावा लागुऔषध खैरो हिरोइन कारोबार मुद्दामा फरार थिए । खेलकुदका संघहरूमध्ये सबैभन्दा शक्तिशाली मानिने एन्फामा अहिले दावा नै सबैभन्दा प्रभावशाली पदाधिकारी भनेर चिनिएका थिए । 

दावा एन्फाको निर्वाचनमा पंकजविक्रम नेम्वाङको ‘प्यानल’बाट उपाध्यक्ष निर्वाचित भएका थिए । पंकज र कर्माछिरिङ शेर्पाको भिडन्तमा पंकजले बाजी मारेका थिए । २०७५ सालको एन्फा निर्वाचनमा दावा कर्माछिरिङको प्यानलबाट केन्द्रीय सदस्य निर्वाचित भएका थिए । 

केन्द्रीय सदस्य र पदाधिकारीका रूपमा ६ वर्षदेखि एन्फा मुख्यालयमा रहेका दावा लागुपदार्थ कारोबारमा अदालतबाट दोषी ठहर भई कैद सजाय तोकिएका तर अहिलेसम्म कैद भुक्तान नभएर ‘फरार सूची’मा रहेका थिए ।