ओझेलमा रहेको कठबेरुवा झरना

दाङ । राजपुर गाउँपालिका–१ मटेरिया पूर्व–पश्चिम राजमार्गदेखि करीब तीन किलोमिटर दक्षिण अवस्थित कठबेरुवा झरना प्रचारप्रसारको अभावमा ओझेलमा परेको छ । प्रचारप्रसार, पूर्वाधार निर्माण र संरक्षणको अभावमा उक्त झरना ओझेलमा परेको हो ।

एकान्त जङ्गल, पहाडको फेदमा अवस्थित उक्त कठबेरुवा झरनामा वनभोजसँगै घुम्न र नुहाउन पाउँदा स्थानीवासी हर्षित हुन्छन् । त्यहाँ वर्षेनी पाँचदेखि छ हजारको सङ्ख्यामा पर्यटक आउने गरेको स्थानीयहरु बताउछन् ।

पछिल्लो समय राजपुर गाउँपालिका र वडा कार्यालयको सहकार्यमा कठबेरुवा झरना वरिपरि वनभोज स्थल निर्माणका लागि योजना अघि सारेका छन् । वनभोजमा आउने पर्यटकको सजिलोका लागि राजपुर गाउँपालिका–१ को कार्यालयले रु एक लाख खर्च गरी टहरा निर्माण गरेको छ ।

पहाडबाट झरेको पानीलाई त्यहाँ आसपासका करीब ८०० घरधुरीले सिँचाइका लागि प्रयोग गर्छन् । आर्थिक वर्ष २०७५/७६ मा राजपुर गाउँपालिकाले रु आठ लाख खर्च गरेर पानी बग्ने स्थानमा पक्की नाला निर्माण गरेको थियो । राजपुर गाउँपालिका–१ गुरुङखोलाका ३८० घरधुरी, कठबेरुवाका ४०० र मटेरियाका करीब ६० घरधुरीले उक्त झरनाको पानीलाई सिँचाइका लागि प्रयोग गर्छन् ।