तुरतुरे ताल फुट्यो, बडीगाड खोला आसपासमा खतरा

बागलुङ । बडिगाड गाउँपालिका र ढोरपाटन नगरपालिकाको सिमानामा बनेको कृत्रिम तुरतुरे ताल फुटेको छ। झण्डै ७० प्रतिशत भाग फुटेको अनुमान गरिएको छ।

आइतवार साँझ ५ बजेतिरबाट परेको अविरल बर्षा अहिले पनि रोकिएको छैन। तालको सतह को धेरै भाग घटेको छ।
सोहि तालको नजिकै बडिगाड खोलाले मध्यपहाडि लोकमार्गको झण्डै २ सय मिटर भाग वगाएको छ भने सो संगै बागलुङ बुर्तिवाङ सडक पूर्ण रुपमा अवरुद्ध भएको छ।

गत वर्ष बडिगाड गाउँपालिकाको वडा नं. ७ को तुरतुरे भन्ने स्थानमा ठूलो पहिरो जाँदा वडिगाड खोलालाई ७ घण्टा थुनेरताल बनाएको थियो। तटिय क्षेत्रमा रहेका बडिगाड गाउँपालिका भित्रका खाल, खार र खर्वाङ बजार क्षेत्र जोखिममा छन्।

त्यस्तै गुल्मीको मुसिकोट नगरपालिका, चन्द्रकोट गाउँपालिका, सत्यवति गाउँपालिका रुरु गाउँपालिका लगाएतको तटिय क्षेत्रमासमेत उच्च सतर्कता अपनाइएको छ।
तटिय क्षेत्रमा उच्च सर्तकताको लागी समन्वय गरिरहेको बागलुङका प्रमुख जिल्ला अधिकारी लुक वहादुर क्षेत्रीले जानकारी दिएका छन् ।