नगर विकास समितिका कर्मचारीले १० महिनादेखि तलब पाएनन्

कञ्चनपुर । भीमदत्तनगरस्थित विघटित महेन्द्रनगर नगर विकास समितिको कार्यालयमा कार्यरत सात कर्मचारीले विगत १० महिनायता तलब पाएका छैनन् ।

विघटित नगरपालिका समितिका छ स्थायी र एक करारका कर्मचारीले तलब नपाएकोे गुनासो गरेका हुन् ।“नगर विकास समिति विघटन भएको पनि महिनौँ भइसक्यो”, विघटित नगर विकास समितिका सूचना अधिकृत पुष्पराज भट्टले भने, “हामीले गत कात्तिक महिनादेखि तलब खान पाएका छैनौँ ।”

उनले तलबका लागि प्रमुख जिल्ला अधिकारीदेखि शहरी विकास मन्त्रालयसम्म गुहार माग्दा पनि कुनै पहल नभएको बताए । विसं २०६७ यता गठन भएका नगर विकास समितिका नेतृत्वले बजार र आसपासका क्षेत्रमा भएको जग्गा लिजका नाममा प्रक्रिया नपु¥याई वितरण गरेको र व्यापक अनियमितता भएको गुनासो आएकाले शहरी विकास मन्त्रालयले पाँच वर्षअघि सो समितिको कामकाज रोक्का गरेको थियो ।

गत पुसमा मन्त्रिपरिषद्बारा उक्त समितिको अध्यक्षतामा स्थानीय तहका प्रमुख (भीमदत्त नगरपालिकाका प्रमुख) र सदस्य–सचिवमा कार्यकारी अधिकृत रहनुपर्ने व्यवस्था गरी गत फागुन २९ गते राजपत्रमा सूचना प्रकाशन गरेको सूचना अधिकृत भट्टले बताए । “राजपत्रमा सूचना प्रकाशित भइसक्दा पनि नगरपालिकाले विघटित नगर विकास समितिलाई लिने विषयमा कुनै पहल गरेको छैन”, भट्टले भने, “स्थानीय तहमा पनि हस्तान्तरण भएको भए हामीलाई पनि कामकाज गर्न सहज हुने थियो ।”