नुवाकोटको साततले दरबारको पुनर्निर्माण

काठमाडौं । विनाशकारी भूकम्पले क्षतिग्रस्त बनेको नुवाकोटको साततले दरबारको पुनर्निर्माण भईरहेको छ ।चाइनिज एकेडेमी अफ कल्चरल हेरिटेजले साततले दरबार तथा वरिपरिका सम्पदा पुनर्निर्माण थालेको हो ।

नुवाकोट दरबार क्षेत्रभित्रको सात तले दरबार, गारद घर, रंगमहल, बहादुर शाहको बैठक कक्षलगायत दरबार क्षेत्रभित्र रहेको विष्णु र नारायण मन्दिरको पुनर्निर्माण थालिएको दरबार हेरचाह कार्यालयका बिक्रम प्रसाद पुष्पहालले बताए ।

विनाशकारी भूकम्पले दरबार क्षतिग्रस्त बनाएपछि चीन सरकारले गत २०७२ साल साउन महिनामा मर्मत गर्ने प्रतिबद्धता जनाएको थियो । पटक–पटक चिनियाँ प्राबिधिक टोली र चिनियाँ राजदूतको अवलोकन अध्ययन पछी पुनःनिर्माण सुरु भएको जनाइएको छ ।

हाल चिनियाँ प्राबिधिकहरुले दरबारको बिभिन्न स्थानमा प्वाल पारेर नमुना संकलन गरि अध्ययन गरिरेहेका छन् । भुकम्पका कारण क्षतीग्रस्त भएको एतिहाँसिक साततले दरबारलाई पुरानै स्वरुपमा पुनःनिर्माण गर्नुपर्ने स्थानीयहरुको भनाइ छ ।

दरबारमा भएका सामाग्रीकै प्रयोग गरी दरबार निर्माण गरिने बताईएको छ । हाल दरबार लगायत आसपासका सबै संरचनालाई संरक्षण गर्दै पुनःनिर्माण सुरु गर्ने चिनियाँ टोलीको भनाइ छ । २०७२ साल वैशाखमा गएको भूकम्पले दरबार लगायतका सम्पदाहरूमा क्षति पुगेको थियो ।