सवारी साधनबाट जबरजस्ती रकम असुल गर्ने पक्राउ

३ भदौ, पर्सा । पर्सामा बाटो अवरोध गरि सवारी साधनहरुबाट जबरजस्ती रकम असुल गर्ने ३ जनालाई प्रहरीले पक्राउ गरेको छ ।

नगरको शान्ति सुरक्षा कायम राख्नको लागी जिल्ला प्रहरी कार्यालय पर्साबाट खटिएको टोलीले वीरगंज महानगरपालीका वडा २१ परवानीपुर स्थित ड्राईपोर्ट जाने सडकमा भारतीय नम्बरका मालबाहक ट्रक–गाडीहरुलाई सडक रोकी विभिन्न किसिमको डर क्रास देखाएर रकम असुल गर्ने ३ जनालाई प्रक्राउ गरेको हो ।

सोही अभियोगमा प्रहरीले वीरगंज म.न.पा. १७ का विजय प्रसाद यादव, मलमिल मिंया र प्रदिप कुमार गुप्तालाई उनीहरुले असुल गरेको १३ हजार ६ सय नगद रकमसहित पक्राउ गरिएको प्रहरीले जनाएको छ ।

प्रहरी कार्यालय पर्साले दिएको जानकारी अनुसार पक्राउ परेका तीनै जनामाथि सार्वजनिक शान्ति विरुद्धको कसुर आवागमनमा बाधा शिर्षकमा मुद्धा दर्ता गरि अनुसन्धान भैइरहेको छ ।

साथै उल्लेखित व्यहोराको अनुसन्धानको शिलशिलामा सोही समुहका रुपेश कुमार यादवको साथबाट प्रहरीले २६ हजार ७ सय नेपाली र १६ हजार ५ सय भारतीय रकमसमेत बरामद गरि अनुसन्धान भैइरहेको जानकारी दिएको छ ।