केवल नेट र विद्युत प्राधिकरणको तारका कारण नगरवासीहरु जोखिममा

८ भदौ, रौतहट । चन्द्रपुर नगरपालिका भित्र विभिन्न सेवा प्रदायक संस्थाले विद्युतको पोल प्रयोग गरी टाँगेका अव्यवस्थित तारले नगरपालिकालाई जोखिमयुक्त बनाएको छ । नेपाल विद्युत प्राधिकरण शाखा चन्द्रनिगाहपुरले विद्युत सेवा विस्तार गर्न गाडेका पोलहरु प्रयोग गरी विभिन्न सेवाप्रदाय संस्था/कम्पनीले स्थानीयलाई सञ्चार एवं मनोरञ्जन सेवा प्रदान गर्न भनी टाँगेका तारले स्थानीयहरुमा जोखिम बढाएको छ ।

चन्द्रपुर नगरपालिका–६ स्थित झनझनटोलको चोकमा रहेको विजुलीको पोलमा झण्डै आधा दर्जन भन्दा बढी सेवाप्रदायक संस्थाले इन्टरनेट एवं नेटवर्क, टिभी केवलका तार टाँगेका छन् । पोलमै राखेका ‘इन्टरनेट सप्लाई बक्स’ र जताततै झुण्डिएका तारले विद्युत सट भई आगजनी हुने जोखिम उच्च रहेको छ ।अव्यवस्थित ढंगले टाँगेका तारको कारण केही दिन अघि केवल टिभीको तारमा विद्युत सट भई स्थानीय इन्द्रबहादुर तामाङ्को घरमा रहेको टिभी जलेको थियो ।

सोही पोलको तार भुईंमै लत्रिएकोले रातीको समयमा पैदल, मोटरसाइकल तथा साइकल यात्री दुर्घटना पर्न सक्ने सम्भावना अधिक रहेको स्थानीय मनोज पुरीले बताए । सम्बन्धित सेवाप्रदायक संस्था ‘सुविसु’ लाई पोलमा लत्रिएको तार र त्यसबाट हुन सक्ने दुर्घटनाको बारेमा पटक÷पटक जानकारी गराउँदा समेत वास्ता नगरेको उनको गुनासो छ । यस्तै समस्या नगरका सबै वडामा रहेको सम्बन्धित वडावासी बताउँछन् । टाँगिएको अव्यवस्थित तारका कारण नगर कुरुप समेत देखिएको समाजसेवी अनन्त कोइराला बताउँछन् ।

सेवाप्रदायक संस्थाले प्राधिकरणसँग सम्झौता गरेर मात्रै पोल प्रयोग गर्नु पर्नेमा अधिकांशले बिना सम्झौता तार टाँगेर व्यवसाय सञ्चालन गरेका छन् । यस सम्बन्धमा प्राधिकरण मौन छ । विद्युत प्राधिकरण शाखा चन्द्रनिगाहपुरका प्रशासन प्रमुख रमेश हुमागाइँका अनुसार टेक माइण्ड, सुविसु, मेरो टिभी, इन्टर वेभ, ब्रोडलिङ्कलगायत आधा दर्जन भन्दा बढी सेवाग्राहीले विद्युतका पोल प्रयोग गरेका छन् । जसमध्ये टेक माइण्ड र मेरो टिभी संस्थाले मात्र सम्झौता गरेका छन् ।

यसरी सेवाप्रदायक संस्थाले एकातिर राजश्व नै प्रभावित पारेर सेवामूलक व्यवसाय सञ्चालन गरेका छन् भने अर्कोतिर अव्यवस्थित तवरले तारहरु टाँगेर नगर कुरुप बनाउनुकोसाथै जोखिम समेत बढाएको चन्द्रपुर नगरपालिका वडा नम्बर ६ का वडा अध्यक्ष खड्क कुशुवारले बताए ।