जिल्ला प्रहरी कार्यालय पूर्वी नवलपरासीमा अपराधका घटना बढ्यो

मिना कंडेल

११ भदौ, नवलपुर । जिल्ला प्रहरी कार्यालय पूर्वी नवलपरासीमा एक महिनामा अपराधका घटनामा बिगतको तुलनामा भन्दा बृद्धि भएको छ । प्रहरीले गत साउन महिनामा मात्रै अपराधका घटनाबाट र अन्य गरि २० लाख बढि राजस्व असुल गरेको छ भने एक सय २३ ठुला र पाँच हजार बढि साना कारबाहीमा परेका छन् ।

प्रहरीले विभिन्न स्थानबाट दुई हजार लिटर अवैध घरेलु मदिरा बरामद गरि नष्ट गरेको जनाएको छ । जिल्ला प्रहरी प्रमुख मोहनप्रसाद पोखरेलका अनसुार मादक पदार्थ सेवन गरी सार्वजनिक स्थानमा होहल्ला गर्ने सात जनालाई पक्राउ गरी ७ हजार जरिवाना गराईएको छ भने नियम विपरित नदिजन्य पदार्थ उत्खननमा प्रयोग भएका एक टिप्पर र २२ वटा ट्याक्टरलाई चालक सहित पक्राउ गरी रु. तिन लाख पचपन्न हजार जरिवाना गराईएको प्रहरी उपरीक्षक पोखरेलले बताए ।

यसै गरि गैंडाकोट नगरपालिका ५ मा जुवातास खेल्ने १० जनालाई पक्राउ गरि रु.८० हजार ९३५ नगद बरामद गरिएको छ भने कावासोती नगरपालिकामा नौ जना जुवाडेबाट रु ८१ हजार ७६५ नगद बरामद गरिएको प्रहरी उपरीक्षक पोखरेलले बताए ।

प्रहरीले एक महिनाको अबधिमा गैडाकोट, विनयी त्रिवेणी, कावासोती, देवचुली लगायतका स्थानहरुमा दुई हजार पाँच सय अवैध गांजा फडानी गरि गाँजाका बोटहरु नष्ट गरेको जनाएको छ यो अबधिमा ४० जना महिला, दुई बालक,१५ बालिका, दुई जना जेष्ठ नागरिक ५९ जना हराएकोमा १५ महिला एक बालक, १० बालिका गरी २६ जना फेला परेको प्रहरी उपरीक्षक पोखरेलले बताए ।

प्रहरीले विभिन्न अपराधमा संलग्न रही फरार रहेका ११ जनालाई पक्राउ दुई वर्ष एक महिना १५ दिन कैद र त्यसबाट दुई लाख २७ हजार ९४६ जरिवाना असुल गरिएको पोखरेलले जानकारी दिए । साथै प्रहरीले लागू औषध ओसार पसारमा ३८ जना पक्राउ गरि तीनीहरुबाट एम्पुल ८२८७ (झोल), टयाबलेट १०६१, स्पाष्मो ३२ वटा बरामद गरिएको प्रहरीले जनाएको छ ।

साथै चोरी घटनामा पाँच जना पक्राउ र बहु विवाहको आरोपमा दुई पुरुष र दुई महिला सहित चार पक्राउ परेका छन् भने जवरजस्ती करणी गर्ने दुई जना पक्राउ परेका छन् । यसै गरि बालयौन दुरुपयोगमा दुई जना पक्राउ परेका छन् । ट्राफिक नियम उलंघन गर्ने ४ हजार ४ सय १७ वटा सवारी साधनलाई कारवाही गरी रु. २६ लाख ६७ हजार राजश्व असुल भएको प्रहरीले जनाएको छ । यसै गरि अवैध भन्सार चोरी निकासी पक्राउबाट एक लाख ८७ हजार ७ सय १० राजश्व संकलन भएको प्रहरी उपरीक्षक पोखरेलले जानकारी दिए ।