देशका विभिन्न स्थानमा डेङगुको संक्रमण फैलिदै,नवलपुरको गैडाकोटमा एकको मृत्यु

१९ भदौ,नवलपुर । देशका विभिन्न स्थानमा केही दिनयता डेङगुको संक्रमण फैलिएको छ । चितवन र नवलपुर क्षेत्रमा यसको प्रकोप अझ बढी देखिएको छ ।

नवलपरासी (वर्दघाट सुस्तापूर्व) जिल्लाको गैंडाकोटमा अझ बढी संक्रमण रहेको पाईएको हो । गैंडाकोटका विभिन्न स्वास्थ्य संस्था तथा चितवनमा उपचार गराउनेहरुको एकिन तथ्याङ्क नभएपनि गैंडाकोट १६ का एक व्यक्तिको एक हप्ताअघि मात्रै मृत्यु भएको छ ।

जिल्लामा यति नै व्यक्तिमा संक्रमण छ भन्ने एकिन तथ्याङ्क नरेहको स्वास्थ्य कार्यालय नवलपरासी (वर्दघाट सुस्तापूर्व) का प्रमुख ख्याम केसीले बताए । उनले स्थानीय तहमा रहेका नगर स्वास्थ्य शाखाहरुले यस रोगबारे लिखितरुपमा कुनै जानकारी नपठाएका कारण यसै भन्न नसकिने बताए । लिखित रुपमा जानकारी गराउन पालिकाका स्वास्थ्य शाखाहरुलार्ई जानकारी गराईएको उनले बताए ।

उता चितवन जिल्लामा हालसम्म ५३७ जनालाई डेङ्गुको सङ्क्रमण देखिएको छ । डेङ्गु र स्क्रबटाइफसका कारण तीन जनाको मृत्यु भइसकेको छ । जिल्लाको भरतपुर महानगरको शहरी क्षेत्रमा डेङ्गुको संक्रमण बढिरहेको छ ।

स्वास्थ्य तथा जनसङ्ख्या मन्त्रालयका अनुसार, केही महिनाअघि सुनसरीमा देखिएको डेंगु अहिले ४२ जिल्लामा फैलिएको छ भने, १५ सय भन्दा बढी नागरिक संक्रमित भएका छन् ।