सामुदायिक वनमा अबैध रुपमा काठ कटान गरि फरार रहेका दुई पदाधिकारी पक्राउ

मिना कंडेल
२० भदौ, नवलपुर । पुर्वी नवलपरासीको विनयी त्रिबेणी गाउँपालिका वडा नं ५ धुरकोटमा रहेको तालदेवी सामुदायिक वनमा काठ अबैध रुपमा कटान गरि फरार रहेका दुई पदाधिकारी पक्राउ परेका छन ।

तालदेवी सामुदायिक वनमा बिभिन्न ७९ वटा रुखको दुई हजार एक सय २३ क्युफीट काठ अबैध रुपमा कटान गरि २७ दिनदेखि फरार भएका समितिका अध्यक्ष दिपकबहादुर जीसी र सचिव जयबहादुर बाह्घरेलाई पक्राउ गरिएको अनुसन्धान अधिकृत तथा सहायक बन अधिकृत कुलचन्द्र दवाडीले बताए ।

सो सामुदायिक वनको काठ काट्न संलग्न नौ जना मध्ये दुई जनालाई पक्राउ गरिएको र अन्य सात जनाको खोजी भैरहेको दवाडीले बताए । करिब ५० लाख मुल्य पर्ने सो काठ कटानमा संलग्नहरुको ब्यापक खोजी भैरहेको छ । स्थानीय स्तरमा हस्तान्तरण समेत नभएको काठ तस्करको मिलोमतोमा काठ कटान भएपछि उनीहरु सबै फरार भएको जिल्ला वन डिभिजनल अधिकृत पुर्णेश्वर सुवेदीले बताए ।

महेन्द्र राजमार्गको दुम्कीबासदेखि २० किलोमिटर उत्तरमा पर्ने धुरकोटको तालदेवी सामुदायिक वनमा अबैध रुपमा काठ कटान भएपछि स्थानीय सामुदायिक वनका उपभोक्ता ,सदस्य र काठ तस्करहरु फरार थिए । अबैध रुपमा काठ कटान गर्नेहरुलाई वन ऐन अनुसार कारबाही गरिने सुबेदीले बताए ।