विश्व प्रेस काउन्सिलको महासचिव राष्ट्र बन्यो नेपाल

२८ भदौ, काठमाडौं । प्रेस काउन्सिल नेपाल विश्व प्रेस काउन्सिलको महासचिव राष्ट्रमा चुनिएको छ । हाल प्रेस काउन्सिलका कार्यवाहक अध्यक्षको जिम्मेवारी किशोर श्रेष्ठले सम्हाल्दै आएका छन् । उनैको नेतृत्वमा रहेको काउन्सिलको प्रतिनिधि मण्डलले शुक्रबार अजरबैजनको राजधानी बाकुमा सम्पन्न विश्व प्रेस काउन्सिलको साधरण सभामा भाग लिएको थियो ।

हरेक देशमा रहेको प्रेस काउन्सिलको नेतृत्व जसले गरेको छ सोही व्यक्तिले यो जिम्मेवारी वहन गर्ने प्रचलन रहेको छ । हाल नेपाल प्रेस काउन्सिलका कार्यवाहक अध्यक्ष किशोर श्रेष्ठ रहेका छन् । सोही कारण विश्व प्रेस काउन्सिलको महासचिवमा उनी चयन भएका हुन् । नेपालले पाएको यो जिम्मेवारी नेपाल र नेपाली पत्रकारीता क्षेत्रको गर्वको विषय बनेको छ ।

नेपाल प्रेस काउन्सिल विश्व प्रेस काउन्सिलको सदस्य हो । काउन्सिलको अध्यक्षमा प्रा.डा. सुले अकर (साइप्रस), उपाध्यक्षमा अफ्लातुन अमासोभ (अजरबैजान), कोषाध्यक्षमा डा. तामेर अताबारुत (टर्की) चयन भएका छन् ।

सो सम्मेलनमा टर्की, भारत, श्रीलङ्का, केन्या, तान्जानिया, जिम्बाब्वे, अजरबैजान, इराक, कोसोभो, म्यासेडोनिया, बङ्गलादेश, साइप्रस, सेसेल्स, मालाबी, म्यान्मासहितका देश सहभागी थिए ।