सभामुख महरामाथि स्वतन्त्र र निष्पक्ष छानविन हुनुपर्छ : महामन्त्री कोइराला

१४ असोज, काठमाडौं । नेपाली कांग्रेसका महामन्त्री डा. शशांक कोइरालाले संसद सचिवालयकी महिला कर्मचारीलाई बलात्कार गरेको आरोप लागेका सभामुख कृष्णबहादुर महरामाथि निश्पक्ष छानविन हुनुपर्ने बताएका छन् । उनले सभामुख माथि लागेको आरोप गम्भीर भएको भन्दै स्वतन्त्र र निष्पक्ष छानविन हुनुपर्ने बताएका हुन् ।

नेपाल प्रेस यूनियन, काठमाडौं शाखाले मंगलबार बिहान अनामनगरमा आयोजित नागरिक अधिकार र संविधान विषयक अन्तरक्रिया कार्यक्रममा महामन्त्री कोइरालाले भने–सभामुखमाथि जुन प्रकारको आरोप लागेको छ, यो निकै गम्भीर विषय भएकाले निष्पक्ष छानविन हुनुपर्छ ।

सभामुख महरालाई संसद सचिवालयकी एक महिला कर्मचारीले बलात्कार गरेको आरोप लगाएकी छन् । उनले आइतबार सभामुख महराले आफूलाई बलात्कार गरेको आरोप लगाएकी हुन् ।

महिला कर्मचारीले बलात्कार गरेको आरोप लगाएपछि सभामुख महराले राजीनामा दिने तयारी गरेका छन् । प्रधानमन्त्री निवास बालुवाटारमा भर्खरै सम्पन्न नेकपाको सचिवालय बैठकले महरालाई सभामुख र सांसद दुवै पदबाट राजीनामा दिएर छानविन प्रक्रियालाई सघाउनु उचित हुने निर्णय गरेको छ ।