दशै घरमा फूलपाती भित्राएपछि टुँडिखेलमा हर्ष बढाई [फोटो फिचर]

१८ असोज, काठमाडौं । बडादशैंको सातौ दिन शनिबार नेपाली सेनाले काठमाण्डौको टुँडिखेलमा फुलपातीको हर्षबढाई गरेको छ ।

हनुमानढोका दरबारस्थित दशै घरमा फूलपाती भित्राएपछि शनिबार अपरान्ह सेनाले सैनिक मञ्च टुँडिखेलमा हर्ष बढाई समारोह गरेको हो ।

समारोहमा नेपाली सेनाको एक टुकडीले सलामी अर्पण गरेको थियो भने ‘बडा दशैं २०७६’ को अबसरमा नेपाली सेनाले राईफलबाट छिटो लहरे बढाइँ, बेग्ला बेग्लै पाटामा एकठ्ठा बढाइँ र सबै पाटाले एकठ्ठा बढाइँ गरेको थियो ।

त्यसैगरी, सोही अवसरमा बढाइँ कवाज टोलीले नेपाली सेनाकोे चिन्ह षट्कोण तथा राष्ट्रिय झण्डाको आकृति प्रदर्शन गरी लहरे र एकठ्ठा बढाइँ गर्नुको साथै विभिन्न तोपबाट समेत लहरे तथा एकठ्ठा बढाइँ गरेको थियो । सो क्रममा सेनाको हेलिकप्टरबाट पुष्पबृष्टि गरिएको थियो ।

समारोहमा राष्ट्रपति विद्यादेवी भण्डारी, प्रधानमन्त्री केपी शर्मा ओली, प्रधानन्याधिश चोलेन्द्र शम्शेर जवरा, राष्ट्रियसभाका अध्यक्ष गणेश तिमिल्सिना लगाएत संबैधानिक निकायका प्रमुख, उच्चपदस्थ सरकारी अधिकारी, नेपालका लागि विभिन्न देशका राजदुत लगायतको उपस्थिति थियो ।

नेपाली सेनाले प्रत्येक बर्ष फुलपातीका दिन फुलपाती भित्राएको अवसरमा हर्षबढाई समारोह गर्दै आएको छ ।