पूर्व प्रम र राजदूत बालुवाटारमा

२३ असोज, काठमाडौं । चिनियाँ राष्ट्रपति सी चिन पिङको आसन्न नेपाल भ्रमणलाई फलदायी बनाउन भन्दै प्रधानमन्त्री के पी शर्मा ओलीले आज विहान सरकारी निवासमा पूर्व प्रधानमन्त्री तथा राजदूतहरुसँग छलफल गरेका छन् ।

सी भ्रमणका क्रममा नेपालले के कस्ता मुद्धा उठाउने र कसरी लाभ प्राप्त गर्ने भन्ने विषयमा छलफल केन्द्रित भएको बताइएको छ। कार्यक्रममा पूर्व प्रधानमन्त्री एवं प्रमुख प्रतिपक्षी दलका सभापति शेरबहादुर देउवा लगायत पूर्व प्रधानमन्त्रीहरु माधवकुमार नेपाल, झलनाथ खनाल, पुष्पकमल दाहाल, डा. बाबुराम भट्टराई तथा खिलराज रेग्मी सहभागी छन् ।

सो अवसरमा प्रधानमन्त्री ओलीले चिनियाँ प्रधानमन्त्री सीसँग नेपालले गर्न लागेको सन्धि सम्झौता लगायत महत्वपूर्ण विषयमा अवगत गराउन् कार्यक्रम रहेको प्रधानमन्त्रीका प्रेस सल्लाहकार कुन्दन अर्यालले बताए ।

छलफलमा परराष्ट्र मन्त्री लगायत मन्त्रालयका उच्च पदस्थ अधिकारी पनि सहभागी छन् । यस्तै चीनका राजदूत लीलामणि पौडेल तथा पूर्व राजदूतहरु महेश मास्के, टंक कार्की लगायतको उपस्थिति रहेको छ ।

सीको भ्रमणका क्रममा नेपालले चीनसँग रेल्वे लगायत केही महत्वपूर्ण विषयमा सम्झौता गर्ने कार्यक्रम तय गरेको छ ।चिनियाँ राष्ट्रपति सी पर्सि शनिबार दुई दिने राजकीय भ्रमणका लागि काठमाडौं आउँदै छन् । चिनियाँ राष्ट्रपतिको तहबाट २३ वर्ष पछि यो भ्रमण हुन लागेको छ ।