प्रहरी बुलेटिन : कहाँ के भयो ? [थाहा पाउनुस]

२६ असोज, काठमाडौं । झापाको बुद्धशान्ति गाउँपालिका-४ सुनमाईबाट अवैध लागूऔषध गाँजा करिब ६ केजी सहित सोही ठाउँ बस्ने २२ वर्षीय सुरेन तामाङलाई शनिबार राति प्रहरीले पक्राउ गरेको छ ।

ईलाका प्रहरी कार्यलय बुधबारेबाट खटिएको प्रहरीले मे.१ च ६६८५ नम्बरको टाटासुमो जीप जाँच गर्ने क्रममा डिक्कीमा लुकाई छिपाई राखेको अवस्था उक्त परिमाणको लागूऔषध गाँजा फेला पारी जीपमा सवार तामाङलाई पक्राउ गरेको हो ।

पर्वत, जलजला गाउँपालिका-३ बस्ने २१ वर्षीय सुवास जिसीलाई अवैध लागूऔषध गाँजा करिब ५ सय ग्राम सहित शनिबार राति प्रहरीले पक्राउ गरेको छ । लागूऔषध सेवन गरी उनले आफ्नै बुवालाई कुटपिट गरेको भन्ने खबर प्राप्त हुनासाथ जिल्ला प्रहरी कार्यालय पर्वत र प्रहरी चौकी वारीवेनीबाट खटिएको प्रहरीले उनलाई उक्त परिमाणको लागूऔषध सहित फेला पारी पक्राउ गरेको हो । यस सम्बन्धमा स्थानीय प्रहरीले आवश्यक अनुसन्धान गरिरहेको छ ।

काठमाडौं, गोकर्णेश्‍वर नगरपालिका-९ आरुवारी सिमलटार बस्ने रमेश तामाङको घरमा जुवातास खेलिरहेको अवस्थामा कास्की पोखरा महानगरपालिका-१२ घर भएका ४२ वर्षीय राज कुमार गुरुङ समेत २१ जनालाई नगद १८ लाख ९२ हजार रुपैयाँ र ९ बुक तास सहित आइतबार बिहान प्रहरीले पक्राउ गरेको छ ।

यसैगरी काठमाडौं, बुढानिलकण्ठ नगरपालिका-१० बस्ने कृष्ण बहादुर क्षेत्रीको घरमा जुवातास खेलिरहेको अवस्थामा कृष्ण बहादुर समेत ५ जनालाई नगद १६ हजार १ सय ६५ रुपैयाँ र ३ बुक तास सहित शनिबार राति प्रहरीले पक्राउ गरेको छ ।
कास्की, पोखरा महानगरपालिका-२ अधिकारी टोल बस्ने ६५ वर्षीय राज बहादुर गुरुङको घरमा जुवातास खेलिरहेको अवस्थामा राज बहादुर गुरुङ समेत ४ जनालाई नगद २९ हजार ९ सय २० रुपैयाँ र ३ बुक तास सहित शनिबार दिउँसो प्रहरीले पक्राउ गरेको छ ।

धनुषाको विदेह नगरपालिका-५ मुडिवा बस्ने ४० वर्षीय दिनेश कुमार ठाकुरलाई कुटपिट गरी घाइते बनाएको अभियोगमा सोही ठाउँ बस्ने २६ वर्षीय प्रदिप मण्डल समेत ५ जनालाई आइतबार बिहान प्रहरीले पक्राउ गरेको छ ।

दिनेश कुमार ठाकुरलाई मण्डल समेतका ५ जनाले कुटपिट गर्दा गम्भीर घाइते भएको भन्ने खबर प्राप्त हुनासाथ प्रहरी चौकी गिद्धबाट खटिएको प्रहरीले कुटपिटमा संलग्न उनीहरुलाई पक्राउ गरेको हो । कुटपिटबाट घाइते भएका ठाकुरको रामजानकी अस्पताल जनकपुरमा उपचार भइरहेको छ । यस सम्बन्धमा प्रहरीले आवश्यक अनुसन्धान गरिरहेको छ ।

कैलाली, सुर्खेत, सप्तरी र पर्साका विभिन्न स्थानमा भएका छुट्टाछुट्टै सवारी दुर्घटनामा परी ४ जनाको मृत्यु भएको छ ।
कैलाली, लम्कीचुहा नगरपालिका-३ गोराङगेस्थित सडकमा से.७ प १४९६ नम्बरको मोटरसाइकल अनियन्त्रित भई शनिबार दिउँसो दुर्घटना हुँदा गम्भीर घाइते भएका मोटरसाइकलमा सवार टिकापुर नगरपालिका-१ बस्ने २१ वर्षीय मदन शाहीको सेती प्रादेशिक अस्पताल धनगढीमा उपचारको क्रममा मृत्यु भएको छ ।

दुर्घटनामा घाइते भएका चालक टिकापुर नगरपालिका-१ बस्ने १८ वर्षीय अभिषेक सोडारीको टिकापुर अस्पतालमा उपचार भइरहेकोमा थप उपचारको लागि मेडिकल कलेज कोहलपुर रिफर गरिएको छ ।

सुर्खेत, भेरीगंगा नगरपालिका-५ हर्रेस्थित सडकमा बा.३ ख ५२१६ नम्बरको फोर्स गाडीबाट खसेर भेरीगंगा नगरपालिका-४ बस्ने ४० वर्षीय यम बहादुर खत्रीको शनिबार घट्नास्थलमै मृत्यु भएको छ । गाडी र चालकलाई प्रहरीले नियन्त्रणमा लिएको छ ।

सप्तरी, रुपनी गाउँपालिका-१ रुपनी बजारस्थित सडकमा ना.५ ख ६९६ नम्बरको बसले को.२६ प ८६१६ नम्बरको मोटरसाइकललाई शनिबार राति ठक्कर दिँदा गम्भीर घाइते भएका मोटरसाइकल चालक अग्निसायर कृष्णसवरण गाउँपालिका-८ बस्ने ४५ वर्षीय घुरण मिजारको घोपा अस्पताल धरानमा उपचारको क्रममा मृत्यु भएको छ । बस र चालकलाई प्रहरीले नियन्त्रणमा लिएको छ ।

पर्सा, वीरगंज महानगरपालिका-१४ स्थित सडकमा ना.६१ प ४४५१ नम्बरको मोटरसाइकलको ठक्करबाट पैदलयात्री सोही ठाउँ बस्ने दार्चुला वेथान नगरपालिका-७ घर भएकी ३५ वर्षीया बिषन खत्रीको शनिबार राति मृत्यु भएको छ । ठक्करबाट गम्भीर घाइते भएकी उनको वीरगंज हेल्थ केयरमा उपचारको क्रममा मृत्यु भएको हो ।

साथै दुर्घटनामा घाइते भएका मोटरसाइकल चालक र वीरगंज महानगरपालिका-१४ बस्ने २९ वर्षीय भरत भण्डारीलाई उपचारको लागि नारायणी अस्पताल वीरगंज पठाइएको छ । दुर्घटनाका सम्बन्धमा स्थानीय प्रहरीले आवश्यक अनुसन्धान गरिरहेको छ ।

यता काठमाडौंका कागेश्वरी मनोहरा नगरपालिका-५ थली बस्ने सिन्धुपाल्चोक घर भएका ४५ वर्षीय जित बहादुर आचार्यको जस्ताको टहरामा ग्याँस लिक भई शनिबार राति आगलागी हुँदा करिब २ लाख रुपैयाँ बराबरको धनमाल नष्ट भएको छ ।

स्थानीय बासिन्दा तथा दमकलको सहयोगमा प्रहरीले आगलागी नियन्त्रणमा लिनुका साथै यस सम्बन्धमा आवश्यक अनुसन्धान गरिरहेको छ ।