नेकपाको चियापान : समोसा, निम्की, केरा र लड्डु [फोटोफिचर]

२९ असोज काठमाडौं । दशैं, तिहार, नेपाल सम्वत् र छठ पर्वको अवसर पारेर सत्तारुढ नेपाल कम्युनिस्ट पार्टी ‘नेकपा’ले बुधबार चियापन कार्यक्रम सम्पन्न गरेको छ ।

भृकुटीमण्डपमा भेला भएका नेता, कार्यकर्ता तथा शुभचिन्तकहरुलाई नेकपाका अध्यक्ष एवं प्रधानमन्त्री केपी शर्मा ओली र अर्का अध्यक्ष पुष्पकमल दाहाल प्रचण्डले सम्बोधन गरेका थिए ।

चियापानमा पार्टीका नेता, कार्यकर्ता तथा आम जनसमुदायको सहभागीता थियो । त्यस्तै विभिन्न राजनीतिक दलका नेता, मन्त्री तथा सांसद, संवैधानिक अंगका पदाधिकारी, नेपालस्थित कूटनीतिक नियोगका प्रमुख तथा प्रतिनिधि, सरकारका उच्चपदस्थ पदाधिकारी, सेवानिवृत्त पदाधिकारीको पनि चियापानमा सहभागीता थियो ।

मुलुकको बहुजातीय, बहुभाषिक तथा बहुधार्मिक विविधताभित्रको एकता, आपसी सद्भाव, सहिष्णुता, साझेदारी र सहकार्यको मौलिक विशेषता अनि लामो समयदेखि चल्दै आएको चाडबाड तथा संस्कृतिले नेपाली नेपालीबीचको एकतालाई अझ मजबूत बनाउने नेकपाले जनाएको छ ।

चियापानमा प्रधानमन्त्री तथा अध्यक्ष ओलीलाई बाजा बजाएर स्वागत गरिएको थियो । सांस्कृतिक कार्यक्रमसहित आयोजना गरिएको चियापानमा निम्तालुहरुका लागि समोसा, निम्की, केरा र लड्डु दिइएको थियो ।

तस्विर : रासस