एनआरएनएको निर्वाचन : परम्परागत मतदान सुरु

३० असोज काठमाडौं । गैरआवासीय नेपाली संघ ‘एनआरएनए’को निर्वाचनमा परम्परागत मतदान सुरु भएको छ ।प्राविधिक समस्या आएपछि विद्युतीय मतदान रद्द गरी परम्परागतरुपमा केही बेर अघिदेखि मतदान सुरु भएको निर्वाचन समितिले जनाएको छ ।

बुधबार निर्धारित समय भन्दा करिब तीन घण्टा ढिलो बेलुका ८ बजे मतदान सुरु भएको केहीबेरमै कम्प्युटरमा समस्या आएको भन्दै मतदान स्थगित भएको थियो ।

नयाँ नेतृत्वका लागि कुमार पन्त र कुल आचार्य प्यानलसहित प्रतिस्पर्धामा उत्रिएका छन् । अध्यक्षका उम्मेदवार पन्तको प्रस्तावकमा राधिका गुरुङ र समर्थकमा डीबी क्षेत्री छन् । त्यस्तै अध्यक्षका अर्का उम्मेदवार आचार्यको प्रस्तावकमा दिलबहादुर गुरुङ र समर्थकमा विश्व आदर्श पण्डित छन् ।

निर्वाचन समितिले सार्वजनिक गरेको अन्तिम मतदाता नामावली अनुसार चार जना निर्वाचित हुने उपाध्यक्ष पदमा ९ जनाको उम्मेदवारी परेको छ । जसमा हिक्मतबहादुर थापा, किरणविक्रम थापा, अर्जुनकुमार श्रेष्ठ, नरेन्द्रबहादुर भाट, डा। बद्री केसी, मन केसी, धर्मराज अधिकारी, सोनाम लामा र डा।केशव पौडेल छन् ।

एक जना निर्वाचित हुने महिला उपाध्यक्षमा सपिला राजभण्डारी र रविना थापाको उम्मेदवारी परेको छ । महासचिवमा जानकी गुरुङ र डा. हेमराज शर्माको उम्मेदवारी परेको छ । गुरुङ आचार्य र थापा पन्त प्यानलका हुन् । २ जना निर्वाचित हुने सचिव पदमा ७ जनाको उम्मेदवारी परेको छ । जसमा दीपकप्रसाद ओली, सुष्मा लिम्बु, अभिमानसिंह बस्नेत, शिवकुमार बरुवाल, गौरीराज जोशी, आरके शर्मा र विनय अधिकारी छन् ।

त्यस्तै कोषाध्यक्ष पदमा तीन जनाको उम्मेदवारी परेको छ । जसमा आचार्य प्यानलबाट सोमनाथ सापकोटाले उम्मेदवारी दिएपनि उम्मेदवारी फिर्ता लिदै महेशकुमार श्रेष्ठलाई सर्मथन गरेका छन् । स्वतन्त्र रुपमा भने सुदन थापाले उम्मेदवारी दिएका छन् ।

एक जना निर्वाचित हुने सहकोषाध्यक्षमा लोकप्रसाद दाहाल र गोविन्दप्रसाद गौतमको उम्मेदवारी परेको छ ।महिला संयोजकमा प्रमिला खड्का बस्नेत, भोमादेवी लिम्बु र संगीता मरहट्टाको उम्मेदवारी परेको छ । युवा संयोजकमा हिमाल गुरुङ, स्वतन्त्रप्रताप थापा र सुदीप कार्कीको उम्मेदवारी परेको छ ।

मंगलबारदेखि सुरु भएको नवौँ गैरआवासीय नेपाली विश्व सम्मेलन तथा अन्तर्राष्ट्रिय महाधिवेशनमा विश्वका ८२ शाखा मध्ये ६० वटा भन्दा बढी शाखाबाट प्रतिनिधित्व छ।  २६ सय १३ मतदाता रहेको निर्वाचन समितिले जनाएको छ ।

कार्यक्रमको तालिका अनुसार प्रधानमन्त्री ओलीद्धारा समापन गर्ने भनेपनि निर्वाचन लम्बिएका कारण सम्भवत भोली समापन हुने अनुमान गरिएको छ ।