एनआरएनए : १६ सय १० मत गणना सकिँदा कुलप्रसाद आचार्य अगाडि

१ कात्तिक, काठमाडौं । गैरआवासीय नेपाली संघ ‘एनआरएनए’को नयाँ नेतृत्वका लागि भएको चुनावको मतगणना भइरहेको छ ।

बिहीबार रातिदेखि सुरु भएको मतगणनामा केहीबेर अघिसम्म ओसिनिया र अफ्रिका क्षेत्रको गणना सकिएको निर्वाचन अधिकृत शिव रिजालले जानकारी दिए ।

यी क्षेत्रका १६ सय १० मत गणना सकिँदा कुलप्रसाद आचार्य अगाडि रहेको निर्वाचन समितिले जनाएको छ । ९ बजेसम्ममा मतगणना सकिने उनले बताए । बुधबार अबेर सुरु भएको मतदान भोटिङ मेसिनमा समस्या आएपछि बिहीबार बिहानसम्मका लागि स्थगित गरिएको थियो ।

फेरि, बिहीबार मतदाता नामावलीमा विवाद भएपछि मतदान प्रक्रिया ढिलो मात्रै सुरु भएको थियो । सँघको नयाँ अध्यक्षमा कुमार पन्त र कुलप्रसाद आचार्य उम्मेद्वार छन् । २५ सदस्यीय कार्यसमितिका लागि ७५ जना उम्मेद्वार छन् ।