कांग्रेस उम्मेदवार तोक्न कस्सियो

१४ कार्तिक, काठमाडौं । आउने मंसिर १४ मा हुन गइरहेको संसदीय, प्रदेश र स्थानीय तह अन्तर्गत उपनिर्वाचनमा उम्मेदवार तोक्न नेपाली कांग्रेस पदाधिकारी वैठक भर्खरै सुरु भएको छ ।

पार्टी सभापति शेरबहादुर देउवा निवास बुढानिलकण्ठमा सुरु भएको पदाधिकारी बैठकले प्रदेश, जिल्ला र स्थानीय तहबाट सिफारिश भएका नामबाटै उमेदवार तय गरिने पार्टी प्रवक्ता विश्वप्रकाश शर्माले बताए ।

तिहार अघि नै नाम तय गर्ने भनिएको भएपनि प्रमुख राजनीतिक दलहरुले उमेदवार टुंग्याउन सकेका छैनन् । आजको वैठक उप निर्वाचनमा मात्रै केन्द्रित हुने प्रवक्ता शर्माले जानकारी दिए ।

पदाधिकारी वैठकले तय गर्ने नामलाई आजै वस्ने केन्द्रीय कार्यसमिति वैठकले अनुमोदन गर्ने पनि प्रवक्ता शर्माले बताए । अब हुने उप निर्वाचनमा कास्की २ मा संसदीय , भक्तपुर १ क , बाग्लुङ २ ख र दाङ २ ख मा प्रदेश सभाको रिक्त पद रहेको छ ।

यस्तै धरान नगरपालिका लगायत ५२ स्थानीय तहमा पनि मंसिर १४ मा उप निर्वाचन हुँदै छ ।