सुकुटे बस दुर्घटनामा मृत्यु हुने १५ पुग्यो, बसमा सवार सबै घाइते

१७ कार्तिक, काठमाडौं । अरनिको राजमार्गअन्तर्गत सुकुटेमा भएको बस दुर्घटनामा मृत्यु हुनेको सङ्ख्या १५ पुगेको छ । बसमा ४० जना यात्रु भएको भनिएता पनि यात्रु संख्या बढी रहेको खुलेकाे छ । ४८ जना यात्रु घाइले भएकाे प्रहरीले जनाएकाे छ । यात्रामा सवार प्रायः सबै घाइते भएका छन् ।

दोलखाको मुडे देउरालीबाट काठमाडौंका लागि छुटेको वा २ ख ७२४५ नंको यात्रुवाहक बस सुनकोशी नदीमा खसेको थियो । दश जनाको भने घटनास्थलमै मृत्यु भएको प्रहरीले जनाएको छ ।

अहिले नेपाल प्रहरी, सशस्त्र प्रहरी र स्थानीयवासी उद्धारमा जुटिरहेको स्थानीयवासी ढकप्रसाद तिमिल्सनाले जानकारी दिए । उनका अनुसार केही शव खोलाले बगाएको छ ।

दुर्घटनाग्रस्त बस सुनकोशी खोलामा डुबेको थियो । बसमा ४० भन्दा बढी सवार थिए । जिल्ला प्रहरी कार्यालय सिन्धुपाल्चोकका प्रहरी नायब उपरीक्षक माधवप्रसाद काफ्लेका अनुसार दुर्घटना ठूलो भएकाले क्षति बढ्न सक्नेछ । उनले अहिले पनि उद्धार जारी रहेको जानकारी दिए ।

घाइतेलाई सिन्धु सहाबहार अस्पताल तथा गम्भीर घाइतेलाई काठमाडौं ल्याइएको सशस्त्र प्रहरीका प्रहरी नायब निरीक्षक भूपाल खत्रीले जानकारी दिए ।

बस अनियन्त्रित भई सडकबाट करिब ५ सय मिटर तल सुनकोशी खोलामा खसेकाे थियाे । मृत्यु हुनेहरुमा ८ जना महिला ४ जना पुरुष र २ जना बालबालिका रहेका छन् । दुर्घटनामा परी ४७ जना घाइते भएका छन् । तत्काल दुर्घटनास्थलमा पुगेको प्रहरीले उद्धार तथा खोजी कार्य गरिरहेको छ ।

सप्तरीमा एक वृद्धाकाे मृत्यु

त्यस्तै सप्तरी, बोदेबर्साईन नगरपालिका–२ जोगियास्थित सडकमा स. ४ प ८५६ नम्बरको मोटरसाइकलले ठक्कर दिँदा गम्भीर घाइते भएका सोही ठाउँ बस्ने पैदलयात्री ७० वर्षीय छुतहर मियाँको युनिक अस्पताल रुपनीमा उपचारको क्रममा मृत्यु भएको छ । दुर्घटनामा घाइते भएका मोटरसाइकल चालक सोही ठाउँ मल्हनिया बस्ने ३२ वर्षीय हरि साहको स्थानिय क्लिनिकमा उपचार भइरहेको छ । दुर्घटनाका सम्बन्धमा स्थानीय प्रहरीले आवश्यक अनुसन्धान गरिरहेको छ ।