निजामति कर्मचारीको उमेर हद ६० बर्ष

२८ कार्तिक, काठमाडौं । लामो छलफल र बहसपछि नेपाल निजामती कर्मचारीको उमेर हद एउटै बनाउन सहमति जुटेको छ । अब निजामती सेवामा रहेका सबै राष्ट्रसेवकको उमेर हद ६० वर्ष हुनेछ ।

आज बसेको राज्य व्यवस्था समिति बैठकले यस्तो प्रस्ताव पास गरेसँगै निजामती सेवा ऐनमा संशोधनको बाटो खुलेको छ ।तर यसको पूर्ण कार्यान्वयन भने २०२१ सालपछि जन्म मिति हुनेहरुका लागि हुने छ ।

त्यसअघि जन्म मिति भएकाहरुका लागि भने प्रत्येक वर्ष ६ – ६ महिना मात्र थपिने व्यवस्था गर्नुपर्ने छ । अर्थात , २०१९ साल जन्म मिति भएका कर्मचारीले थप ६ महिना र २०२० साल जन्म भएकाहरुको लागि एक वर्ष सेवा अवधि थपिने भएको छ । यसअघि निजामती सेवा ऐनमा कर्मचारीको सेवा हद ५८ वर्ष मात्र तोकिएको थियो ।

सामान्य प्रशासन मन्त्रालयले संसद्मा पेश गरेको यो विधेयक अब बस्ने संसद अधिवेशनले पारित गरी राष्ट्रपतिबाट प्रमाणिकरण भएलगत्तै कार्यान्वयनमा आउने छ ।

निजामती सेवाका विभिन्न क्षेत्रमा फरक फरक उमेर हद रहँदा समस्या भएको थियो । साथै , संविधान प्रदत्त समानताको हकको समेत बर्खिलाफ रहेको यो व्यवस्था सच्चिएकोमा निजामती कर्मचारी सम्वद्ध विभिन्न संघ संगठनले स्वागत गरेका छन् ।

लोक सेवा आयोगले समेत यस्तो विभेदकारी कानूनमा सुधार गर्न सरकारलाई विगतमा धेरै पटक सुझाव दिएको हो ।