चाबहिल–साँखु सडकखण्ड आज पनि बल्यो

२२ मंसिर, काठमाडौं । पटक–पटक विरोधमा उत्रिएर माग पुरा गराउँदै आएका स्थानीय बासिन्दाहरुले आज पनि एउटै माग लिएर सडक बालेका छन् । चाबहिल–साँखु सडकखण्ड निर्माणमा ढिलाइ भएको भन्दै आज फेरि स्थानीय आन्दोलित भएका हुन् ।

सडकको अवस्था दिनानुदिन खराब हुँदै गएका कारण दुर्घटना बढेको, विस्तारका लागि भत्काइएको सडकले सास्ती दैनिक आउजाउ गर्न गह्रो भएको, सडमा कुद्ने सवारीसाध र हावाहुरीका कारण त्यस क्षेत्र धुलाम्य भएको, जनस्वास्थमा समेत खतरा बढेको भन्दै आइतबार पनि सर्वसाधारणले थलीमा टायर बालेर प्रदर्शन गरेका छन्।

सवारी आवागन नै रोकेर सर्वसाधारण सरकारको काम गराईको विरोधमा सडकमा सरकारविरुद्ध चर्का नाराबाजी गरिरहेका छन् । धुलो मेट्न हालेको पानीले सडक हिलाम्य हुने, सरकारी कोषको रकम खर्च भएको देखिने तर उपलब्धी भने केही नहुने उनीहरुको गुनासो छ । सडक र आसपासका वस्तीहरु दिउँसो धूलोले नै कुहिरीमण्डल बन्ने गरेका छन् । चाबहिलदेखि साँखुसम्मको कूल लम्बाइ ११ दशमलव ४६ किलोमिटर छ । त्यसमध्ये सानो खण्ड मात्रै कालोपत्रे भएको छ । बाकीँ पुरै सडक कच्ची र अस्तव्यस्त छन् ।

सडक निर्माणका लागि गिट्टी बालुवा सडकको बीच भागमा आईपुग्दा यो खण्डमा सवारी आवागमन पनि प्रभावित हुँदै आएको छ । विसं २०७२ मा चाबहिलबाट साँखुसम्म २२ मिटर चौडा चार लेनको सडक बनाउन काठमाडौँ उपत्यका सडक विस्तार आयोजनाले ठेक्का दिएको थियो ।

तर, मुआब्जा विवादका कारण सडक विस्तारको काम केही समय प्रभावित भयो । सरकारले उपलब्ध सडक सीमामै कालोपत्रे गर्ने निर्णय गरेपछि पनि कामले अझै गति लिएको छैन । सडक विभागले भने पुराना प्रणालीको ढलको समस्याका कारण कालोपत्रे अघि बढाउन समस्या भएको बताउँदै आएको छ । त्यसैगरी अहिले विगतमा स्थानीयले सडकका लागि छाडेको क्षेत्र पनि तारबार गर्न थालेकाले समस्या भएको काठमाडौं सडक विस्तार आयोजनाले जनाएको छ ।

समस्या समाधान गर्न स्थानीय तहले पनि भूमिका नखेलेको भन्दै स्थानीयहरु भने आक्रोशित छन् । लामो समयदेखि धुलो र हिलोको मारमा परेका स्थानीयबासिन्दाले यसअघि पनि पटक–पटक सडकमा उत्रिएर विरोध जनाइसकेका छन् । तर ठेकेदार, सरकार र यस सडकसँग सरोकार राख्ने कसैले पनि उचित निकास दिएर सडक निर्माण गर्न सकेका छैनन् ।