डीएपीसहित ९ प्रहरीको कोहलपुर अस्पतालमा उपचार हुँदै

२२ मंसिर, काठमाडौं । बाँके जिल्लाको कोहलपुरमा ट्रकको ठक्करबाट बालिकाको मृत्यु भएपछि बढेको तनाव नियन्त्रणभन्दा बाहिर गएको छ । घटना पछि प्रदर्शनकारीको ढुंगामुढाबाट कोहलपुरका प्रहरी प्रमुख डीएसपी हेमराज शाहीसहित ९ जना प्रहरी घाइते भएका छन् । घाइते शाही लगायत सबैको कोहलपुर शिक्षण अस्पतालमा उपचार भइरहेको समाचार प्राप्त भएको छ ।

आइतवार बिहान कोहलपुर–नेपालगञ्ज सडकखण्ड अन्तर्गत हाइस्कुल चोकमा ट्रकको ठक्करबाट त्रिभुवन उच्च माध्यामिक विद्यालयमा कक्षा ७ मा अध्ययनरत कोहलपु–१० की प्रकृति चन्दको मृत्यु भएको थियो । स्कुले बालिकाको मृत्यु भएपछि विद्यार्थीहरुको समूहले ट्रकमा आगजनी गरेका थिए । स्थिति तनावग्रस्त भएपछि प्रहरीले बल प्रयोग गरी केही राउण्ड हवाई फायर समेत गरेको थियो ।