उपेन्द्र यादवले सरकार छाडे

८ पुष, काठमाडौं । प्रधानमन्त्री केपी ओलीले ज्यादै अपमान र बेइज्जत गरेको निश्कर्ष निकाल्दै अन्ततः उपेन्द्र यादवको समाजवादी पार्टी (फोरम) सरकारबाट बाहिरिने भएको छ ।

गतसाता मात्र क्याविनेट मै प्रधानमन्त्री केपी ओलीको हप्काई खाएका उपप्रधानमन्त्री यादवले संविधान संशोधनको बहानामा सरकारबाट बर्हिगमन खोजेका थिए । सत्तारुढ दलदेखि अन्य पार्टीसँग पनि कुनै सरसल्लाह नगरी संविधान संशोधनको ठाडो प्रस्ताव मन्त्रीपरिषदमा लगेपछि उनले प्रम ओलीको हप्काई खाएका हुन् । यसलाई उपेन्द्रको सरकारबाट बाहिरिन प्रमसँग जानाजान निँहु खोजेको अर्थमा राजनीतिक वृतमा लिईएको थियो ।

आज बिहान बसेको पार्टी उच्च पदाधिकारीको बैठकले अब सरकारमा टाँस्सिनुको कुनै अर्थ नरहेको ठहर गर्दै बाहिरिने निर्णय गरेको हो । प्रधानमन्त्री ओलीको कार्यशैलीको सरकारमै बसेर चर्काे आलोचना गर्दै आएका यादवले अब भने अप्रिय निर्णय लिन बाध्य भएका हुन् ।

यादव र ओलीबीच पछिल्लो समय सम्बन्ध चिस्सिएको थियो । केही समय अघि भारत भ्रमणमा रहेका बेला प्रधानमन्त्री ओलीले यादवसँग कुनै सल्लाह नै नगरी स्वास्थबाट कानून, न्याय तथा संसदीय मन्त्रालयमा उनको सरुवा गरेका थिए । साथै , फोरमले पाएको एउटा राज्यमन्त्री पनि उनले खोसी दिएका थिए ।

त्यसपछि यादवलाई सरकारबाट बाहिरिन ठूलै दवाव परेको भएपनि निर्णय गर्न सकिरहेका थिएनन् । साथै , प्रधानमन्त्री ओलीले फोरमलाई अब सरकारबाटै गलहत्याउने सुँइको यादवले पाईसकेका थिए ।

त्यसको संकेत ओलीले अर्काे मधेस केन्द्रित दल राष्ट्रिय जनता दलसँग बढाएको हिमचिमबाट दिईसकेका हुन् । सरकारमा फोरमलाई राखेपनि राष्ट्रिय सभाको चुनावमा भने राजपासँग गठबन्धन गर्ने ओलीको निर्णयले धेरै कुराको संकेत गरिसकेको थियो ।