शाखा विस्तारमा लागेको प्रभू लाइफ ६० करोडको शेयर निष्काशन गर्ने तयारीमा

९ पुष, काठमाडौं । प्रभु लाइफ इन्स्योरेन्स लिमिटेडले आफ्ना नयाँ तीन शाखा कार्यालयहरु संचालनमा ल्याएको छ । सुर्खेत शाखा, टिकापुर उप–शाखा तथा अत्तरिया उप–शाखाहरुको शुभारम्भ गरी कारोबार शुरु गरेको इन्स्योरेन्सले जनाएको छ । सुर्खेत, टिकापुर तथा अत्तरिया तीनवटै कार्यालयहरुको समुद्घाटन कम्पनीका अध्यक्ष डा. आत्माराम घिमिरेले यही पौष ७ र ८ गतेका दिन गरेका थिए ।

अध्यक्ष घिमिरेले कम्पनी शाखाहरु विस्तारको क्रममा रहेको र अरु जीवन बीमा कम्पनीहरुकाभन्दा राम्रा बीमा योजना भएको तथ्य प्रकाश पार्दै पश्चिम नेपालका विभिन्न स्थानहरुमा भएका शाखा विस्तारबाट आफू हर्षित भएको र यस क्षेत्रका बासिन्दाहरुलाई समेत प्रभु लाइफ इन्स्योरेन्सको बीमा सेवाबाट लाभ लिन आग्रह गरे । समुद्घाटन कार्यक्रममा कम्पनीका प्रमुख कार्यकारी अधिकृत तथा प्रमुख ब्यवसाय अधिकृतहरुको सहभागिता रहेको थियो ।

समुद्घाटन कार्यक्रममा कम्पनीका प्रमूख कार्यकारी अधिकृत नारायणप्रसाद पौडेलले जीवन बीमालाई गाउँसम्म पुर्याउने उद्घेश्यसहित प्रभु लाइफ इन्स्योरेन्सको स्थापना भएको बताउँदै कम्पनीले जीवन बीमा बजारमा महत्वपूर्ण स्थान बनाउने दाबी गरे । आगामी दिनहरुमा कम्पनीले आवश्यकता अनुरुप देशैभरी थप शाखाहरु बिस्तार गर्दे लैजाने र निकट भविष्यमा नै कम्पनीले सर्वसाधारणको लागि रु. ६० करोडको शेयर निष्काशन गर्ने तयारीमा रहेको जानकारी गराए ।