ओलीको दुईतिहाईको दम्भ सकियो : यादव

९ पुष, काठमाडौं । प्रधानमन्त्री खड्गप्रसाद ओली नेतृत्वकाे सरकारसँग १९ महिने यात्रा गरेको समाजवादी फोरमले आजबाट औपचारिक रुपमा बाहिरिने निर्णय गरेको छ । प्रधानमन्त्री ओलीले पूर्वसहमति पालना नगरेको भन्दै समाजवादी पार्टीले सत्ता छाड्ने निर्णय गरेको हो ।

पार्टीद्वारा बुधवार राजधानीमा आयोजित पत्रकार सम्मेलनमा आजैबाट सरकारलाई दिएको समर्थन फिर्ता लिएको घोषणा गरिएको छ । निवर्तमान उपप्रधानमन्त्री एवं पार्टीका कार्यकारी अध्यक्ष उपेन्द्र यादवले हतारमा संविधान जारी गर्दा त्रुटि भएको स्वीकार गरी ओलीले संविधान संशोधन गर्न सहमति जनाएकाले आफूहरु सरकारमा सामेल भएको स्मरण गरे । तर ओली विगत सहमतिबाट टाढिनु भएकाले हामी सत्तामा टाँस्सिनुको कुनै अर्थ नदेखेर सरकारबाट बाहिरिएको पनि उनले बताए ।

यसका साथै प्रधानमन्त्रीबाट अपमानजनक व्यावहार भएकाले पनि आफूहरु सहयात्रा गर्न नसक्ने निश्कर्षमा पुगेको उनले प्रष्ट्याए । अबको यात्रा प्रतिपक्षको हुने स्पष्ट गर्दै यादवले भने– संविधान संशोधनको पक्षमा जोडदार आवाज उठाउने छौं ।

उनले भने अब ओलीको दुई तिहाईको दम्भ पनि सकिएको छ । दुई तिहाईको दम्भ देखाउने हतियारका रुपमा मात्र आफूहरुलाई दुरुपयोग गर्न खोजेकाले पनि नेकपासँगको सहयात्रा लामो हुन सकेन –यादवले भने ।