शहरका होडिङ बोर्ड हटाइने, बैंक तथा व्यापारिक प्रतिष्ठानहरुकाे कराेडाैंकाे लगानी खरानी !

१० पुष, काठमाडौं । करोडौं खर्च गरेर शहरका चोकचोक र घरघरमा झुण्डाईएका होडिङ बोर्डहरु सरकारले हटाउने भएको छ । खासगरि बैंक तथा व्यापारिक प्रतिष्ठानहरुले बार्षिक करोडौं खर्च गरेर आआफ्नो व्यापारिक विज्ञापनहरु शहरका चोकचोक र घरहरुमा टाग्ने गरेका थिए ।

त्यसले शहरलाई नै कुरुप बनाएको भन्दै सरकारले त्यसरी राखिएका विज्ञापन पाटी (होर्डिङ बोर्ड), पर्चा, पम्पलेट, पोस्टर, तारलगायतका सामग्री अब हटाउने भएको छ । यसबाट बैंक तथा व्यापारिक प्रतिष्ठानहरुकाे कराेडाैंकाे लगानी क्षणभर मै खरानी हुने भएकाे छ ।

गृहमन्त्री रामबहादुर थापाको अध्यक्षतामा आज गृहमन्त्रालयमा बसेको सरोकारवाला निकायसहितको बैठकले काठमाडौं महानगरपालिकाभित्र शुक्रबारदेखि चार वटा समूह बनाई ती सामग्री हटाउन शुरु गर्ने निर्णय गरेको हो । अन्य स्थानीय तहमा सङ्घीय मामिला तथा सामान्य प्रशासन मन्त्रालयमार्फत निर्देशन दिई कारवाही अघि बढाउने बैठकले निर्णय गरेको छ ।

महानगरपालिका,नगरपालिका र व्यक्तिगत घरका मालिकहरुको राम्रो आम्दानीको स्रोतका रुपमा रहेका त्यस्ता विज्ञापन सामाग्रीहरु माथि सरकारको आँखा लागेको हो । यसैगरी,बैठकले अव्यवस्थित टागिएका टेलिफोन, केबल तथा इन्टरनेट सेवाप्रदायकका तार हटाउन समयसीमा तोकी सार्वजनिक सूचना जारी गर्ने र तोकिएको अवधिभित्र नहटाए तारलाई काटेर हटाउने निर्णय गरेको छ ।

गृहमन्त्री थापाले नागरिकको स्वास्थ्य र नगरको पर्यावरणीय सुन्दरतालाई मध्यनजर गर्दै नगरलाई कुरुप बनाउने गरी राखिएका त्यस्ता संरचना हटाइन लागेको बताए । सर्वोच्च अदालतले समेत संरचनाका विषयमा आदेश दिइसकेको र आदेश कार्यान्वयन गर्न सरकार प्रतिबद्ध रहेको उनले जानकारी दिए ।

काठमाडौं महानगरपालिकाका प्रमुख विद्यासुन्दर शाक्यले महानगरपालिकाभित्र शुक्रबारदेखि त्यस्ता संरचना हटाउन शुरु गर्ने प्रतिबद्धता व्यक्त गरे ।

गृहसचिव प्रेमकुमार राईले देशभरका यस्ता संरचना हटाउन सम्बन्धित जिल्ला प्रशासन कार्यालय र प्रहरी प्रशासनको पूर्ण सहयोग रहने जानकारी दिएका छन् ।