सडकमा कराउँदा सीपी गजुरेललाई किन पक्राउ गरियो ?

१३ पुष, काठमाडौं । पूर्वमाओवादी नेता एवं मोहन वैद्य नेतृत्वको नेकपा क्रान्तिकारी माओवादीका वरिष्ठ नेता सीपी गजुरेल पक्राउ परेका छन्।

कालापानी, लिम्पियाधुरा तथा लिपुलेकसहितका क्षेत्र भारतीय प्रशासनले आफ्नो भएको दावी गरेर नक्सानै सार्वजनिक गरेपछि नेपालभित्र चर्किएको राष्ट्रिय स्वाधीनताको आन्दोलनका क्रममा ज्ञापन पत्र बुझाउने क्रममा निषेधित क्षेत्र तोड्न खोजेको भन्दै प्रहरीले उनलाई पक्राउ गरेको हो ।

महानगरीय प्रहरी परिसर काठमाडौंका परिसर प्रमुख एसएसपी उत्तमराज सुवेदीका अनुसार गजुरेललाई हनुमानथानस्थित निषेधित क्षेत्र तोड्ने क्रममा पक्राउ गरिएको हो। गजुरेलसँगै पक्राउ परेका उक्त पार्टी अन्य नेता र कार्यकर्तालाई नेपाल पुलिस क्लब प्रदर्शनीमार्गमा राखिएको छ।

प्रहरी स्रोतका अनुसार सीमा मिचिएकोलगायत विषयलाई लिएर आन्दोलन गर्ने क्रममा गजुरेललगायतको समूहले नेपाल प्रहरीमाथि ढुंगामुढा गरेको थियो । त्यस क्रममा एक जना प्रहरी निरीक्षक र प्रहरी सहायक निरीक्षक सामान्य घाइते भएको सुवेदीले बताए।

सोही आन्दोलनमा सहभागीमध्ये एक जनाले नेपालबहस डटकमलाई भने :– प्रहरीले अनावश्यक बल प्रयोग गरेको छ, देशको सीमा मिचिएको छ तर सरकार कुटनीतिक पहल भइरहेको छ भन्दै मौन बसेको छ । किन ? उनको प्रश्न छ, सीमाना मिचियो भनेर सडकमा कराउँदा आज सीपी गजुरेललाई किन पक्राउ गरियो ?