उच्च सैन्य कमाण्डर सुलेमानीको अन्तिम बिदाईमा लाखौँको भिड

२२ पुस एजेन्सी । अमेरिकाले इराकमा गरेको हवाई आक्रमणमा परि मृत्यु भएका इरानका उच्च सैन्य कमाण्डर मेजर जनरल कासिम सुलेमानीको अन्तिम बिदाईमा लाखौं मानिस सहभागी भएका छन् ।

इरानको राजधानी तेहरानमा सर्वोच्च नेता आयातुल्लाह अलि खामेनीको नेतृत्वमा भएको अन्तिम बिदाई प्रार्थनासँगै भएको इरानको विशेष सैन्य दस्ता कुड्स फोर्सका प्रमुख मेजर जनरलको शव यात्रामा लाखौं मानिस सहभागी भएका हुन् । इरानले सुलेमानीको हत्याको ‘कठोर बदला’ लिने बताएको छ । इरानले आइतबार सन् २०१५ मा भएको परमाणु सम्झौताबाट पूर्ण रुपमा बाहिरिएको घोषणा पनि गरेका थियो ।

६२ वर्षका सुलेमानीको नेतृत्वमा मध्य पूर्वमा इरानको प्रभाव बलियो बन्दै गएको थियो । अमेरिकी राष्ट्रपति डोनाल्ड ट्रम्पको आदेशमा अमेरिकाले गएको शुक्रबार गरेको हवाई आक्रमणमा इराकको राजधानी बग्दादस्थित विमानस्थलबाट बाहिरिँदै गरेका सुलेमानीको मृत्यु भएको हो ।

अमेरिकाले उनलाई आतंककारीको रुपमा लिने गरेको थियो । तर इरानमा भने सुलेमानीलाई राष्ट्रिय नायकका रुपमा ग्रहण गरिन्छ । उनलाई सर्वोच्च नेता आयातुल्लाह अलि खामेनीपछिका दोस्रो प्रभावशाली व्यक्तिका रुपमा लिने गरिएको थियो ।