प्रचण्ड निकट व्यवसायी दुर्गा प्रसाईविरुद्ध पक्राउ पूर्जी

२ माघ, काठमाडौं । सत्तारुढ नेकपा अध्यक्ष पुष्पकमल दाहाल ‘प्रचण्ड’ निकट व्यवसायी दुर्गा प्रसाईबिरुद्ध पक्राउ पुर्जी जारी भएको छ ।

झापाको बी एण्ड सी मेडिकल कलेजका सञ्चालक प्रसाईले बिगतमा प्रधानमन्त्री केपी ओली र प्रचण्डबीच एकता कायम गराउने भूमिका निर्वाह गर्दै लञ्च वैठक आफ्नै घरमा बोलाएर मार्सी चामलको भात खुवाएपछि एकाएक चर्चामा आएका थिए ।

पछिल्लो समय चिकित्सा शिक्षा आयोगका उपाध्यक्ष श्रीकृष्ण गिरीले २० करोड घुस मागेको पत्रकार सम्मेलनमार्फत सार्वजनिक गरेपछि जिल्ला प्रहरी कार्यालय भक्तपुरमा प्रसाईविरुद्ध अभद्र व्यवहारमा उजुरी परेको थियो । गिरीको सोही उजुरीअनुसार जिल्ला प्रशासन कार्यालय भक्तपुरले गिरीलाई पक्राउ गर्न प्रहरीलाई अनुमति दिएको हो ।

प्रशासनले आदेश दिए लगत्तै प्रहरी प्रसाईंलाई पक्रन भक्तपुरस्थित उनको निवास पुगेको थियो । तर अभियुक्त प्रसाईंं प्रहरी पुग्नु अघि नै घरबाट भागिसकेका थिए ।

चिकित्सा शिक्षा आयोगका उपाध्यक्ष डा. श्रीकृष्ण गिरीले प्रसाईविरुद्ध काठमाडौं जिल्ला अदालतमा पनि मानहानीको मुद्दा दायर गरेका छन् । प्रसाईले गएको पुस २३ गते काठमाडौँमा पत्रकार सम्मेलन गरी आफूसँग डा. गिरीले २० करोड घुस मागेको आरोप लगाएका थिए ।

२० करोड घुस दिएमा मेडिकल कलेज सञ्चालन गर्न दिने डा. गिरीले प्रस्ताव गरेको आरोप प्रसाईले सार्वजनिक रुपमा लगाएपछि डा. गिरी आफ्नो मानहानी भएको भन्दै अदालत पुगेका हुन् ।