स्याङ्जाकी महिलाले जन्माइन चम्ल्याहा बच्चा

२ माघ, पोखरा । मणिपाल हस्पिटलमा एक महिलाले चम्ल्याहा बच्चा जन्माएकी छन् । स्याङ्जाको पुतलीबजार नगरपालिका १ की २६ वर्षीया सुनिता पौडल प्रधानले आज बिहान ९ः०० बजे शल्यक्रियामार्फत चार सन्तानलाई जन्म दिएकी हुन् । तीन छोरी र एक छोरालाई जन्म दिएको अस्पतालकी स्टार्फनर्स लक्ष्मी श्रेष्ठले जानकारी दिईन् ।

प्रधानले जन्माएको पहिलो बच्चा छोरीको तौल एक किलो ५ सय ग्राम, दोस्रो बच्चा छोराको तौल एक किलो ३ सय ग्राम, तेस्रो छोरीको तौल एक किलो ३ सय ग्राम र चौथो छोरीको तौल एक किलो ४ सय ग्राम रहेको अस्पतालले जनाएको छ ।

डाक्टर महेन्द्र पाण्डेका अनुसार अहिले नवजात शिशु र आमाको स्वास्थ्य सामान्य रहेको छ । तौल कम भएकाले चारै नवजात शिशुलाई सघन कक्षमा राखिएको बताइएको छ । यसअघि पौडेलका एक छोरा छन् ।