ओलीको नयाँ अवतार

२२ माघ, काठमाडौं । सत्ताधारी दल नेपाल कम्युनिष्ट पार्टी (नेकपा)का अध्यक्षसमेत रहेका खड्गप्रसाद ओलीका पछिल्ला हाउभाउ र कार्यशैली धेरैका लागि विस्मयकारी लाग्न थालेकाे छ । साथै उनको आनीबानी विपरितका गतिविधिले धेरैलाई पत्याउनै मुश्किल भएको छ । प्रधानमन्त्रीका रुपमा उनका अहिलेका अभिव्यक्ति सारै नरम र प्रतिरक्षात्मक रहेका छन् ।

हिजै बेलुकी उनले प्रमुख सञ्चारगृहका सम्पादक र पत्रकारलाई आफ्नो सरकारी निवासमा बोलाएर कुरा सुने । दुई घण्टा पत्रकारका कुरा सुन्ने धैर्यता मात्र राखेनन् बरु आलोचना समेत चूपचाप सुने । केही साता अघि मात्रै उनले नेपालका सम्पादकहरुको मुटु नै नरहेको ठोकुवा गरेका थिए ।

प्रचण्डलाई साथ लिएर ओलीले झलनाथ खनाल, माधवकुमार नेपाल र वामदेव गौतमसम्मको हुर्मत लिएका थिए । कहिले कसको मानमर्दन गर्ने त कहिले कस्को । ओलीको यो चालाले सबैमा चरम आक्रोश बढाएको थियो, तर उनी विरुद्ध मोर्चाबन्दी गर्ने हैसियत भने कसैको थिएन । त्यसैले नेताहरु मरिच जस्तै चाउरिएर बस्न बाध्य थिए । जब प्रचण्डविरुद्ध नै ओलीले फायर खोले त्यसले भने तरंग ल्याइ दियो । सभामुखबाट कृष्णबहादुर महरालाई षडयन्त्रपूर्वक बर्खास्त गर्ने तानाबाना तयार गरिएको रिपोर्टिङ प्रचण्डलाई भएपछि सो पदका लागि गतिलै अडान लिए ।

सरकारले गरेका राम्रो कामको प्रशंसा गर्न नसक्ने सम्पादकको उछित्तो काढेका ओली हिजो भने तिनै सम्पादकसँग आफ्ना भनाईको प्रतिरक्षा गर्दैै थिए, त्यो पनि विनोदी शैलीमा । पत्रकारले लगातार बलिङ गरेकाले आफूले पनि यसो व्याटिङ गरिदिएको उनको ठट्यौलो जवाफ थियो । आखिर किन त ओली जस्ता दम्भी र अहंकारी नेता गले भन्ने प्रश्न ज्यादै गहन र महत्वपूर्ण छ ।

जानकार भन्छन्–ओली पनि समय परिस्थितिलाई अनुकुल बनाउन छद्म रुप लिने माप्पाका खेलाडी हुन् । दुई वर्षको अवधिमा उनले राजकाज चलाउँदा सधैं हुँकार गर्ने उनको शैली र प्रवृत्ति एकाएक फेरिएको हो । त्यसको कारण भने पछिल्लो समय पार्टीभित्रको समीकरणमा आएको फेरबदल नै हो भन्ने ठम्याई उनी निकट नेताहरुकै रहेको छ ।

सभामुख प्रकरणमा ओली नमज्जाले फसे । उनले चाहेको सबै निर्णय हुने गरेको विगत यही प्रकरणबाट अवरुद्ध भयो । ओलीलाई आफू त्यति कमजोर भइसकेको हेक्का थिएन । नत्र एक महिनासम्म सभामुख प्रकरणलाई लम्ब्याएर संसद्लाई बन्धक बनाउने थिएनन् । जब सचिवालय सदस्यको समिकरण उनले अनुभूत गरे, त्यसबाट ओलीको चेत खुल्यो ।

पार्टीभित्र एक अर्काबीच झगडा लगाएर सधैं आफू अनुकूल बातावरण तयार गर्दै थिए ओली । प्रचण्डलाई साथ लिएर ओलीले झलनाथ खनाल, माधवकुमार नेपाल र वामदेव गौतमसम्मको हुर्मत लिएका थिए । कहिले कसको मानमर्दन गर्ने त कहिले कस्को । ओलीको यो चालाले सबैमा चरम आक्रोश बढाएको थियो, तर उनी विरुद्ध मोर्चाबन्दी गर्ने हैसियत भने कसैको थिएन ।

त्यसैले नेताहरु मरिच जस्तै चाउरिएर बस्न बाध्य थिए । जब प्रचण्डविरुद्ध नै ओलीले फायर खोले त्यसले भने तरंग ल्याइ दियो । सभामुखबाट कृष्णबहादुर महरालाई षडयन्त्रपूर्वक बर्खास्त गर्ने तानाबाना तयार गरिएको रिपोर्टिङ प्रचण्डलाई भएपछि सो पदका लागि गतिलै अडान लिए । साथै सचिवालय सदस्यहरुलाई समेत यो प्रकरणमा प्रचण्डले विश्वासमा लिन सफल भए ।

नेता वामदेवको भैंसेपाटी निवासमा ६ जना सचिवालय सदस्यलाई भेला गराई प्रचण्डले ओलीलाई गतिलो जवाफ दिए । ९ सदस्यीय सचिवालयमा ३ जना मात्र ओली पक्षमा देखिएपछि समीकरणले नयाँ स्वरुप धारण गर्यो ।

जे भएपनि अहिले चाहिं ओलीमा नसोचेको परिर्वतन देखा परेको छ । सधैं अरुलाई सुनाउने उनको बानी फेरिएको छ । अरुका कुरा सुन्न थालेका छन् । साथै हिजो आफैंले बोलीचाली नै बन्द गरेका नेताहरुलाई बालुवाटारमा बोलाएर घण्टौं भलाकुसारी गर्न तयार भएका छन् । ओलीको यो अवतार नौलो लागेपनि राजनीतिका कुशल खेलाडीको परिचय दिन उनी सफल भएका छन् ।

परिस्थितिलाई ओलीले राम्रोसँग विश्लेषण गरे । अनि उनको नयाँ यात्रा प्रारम्भ भएको छ । तर ओलीको फेरिएको रुप स्थायी हैन भन्ने बुझाई केही विश्लेषकको रहेको छ । सिंहको जस्तो गर्जने ओली स्वभाव अहिले स्याल जस्तो देखिएको मात्रै हो । समय अनुकुल भएपछि आज मोर्चाबन्दी गर्नेलाई ओलीले गतिलै जवाफ दिने कुरा राजनीतिक विश्लेषक डा. सुरेन्द्र केसीको रहेको छ । केसी भन्छन् :– के पी ओली भनेको सर्प हुन्, आज उनलाई कमजोर बनाउनेलाई यथासमय आएपछि हिसावकिताव लिने छन् ।

बाम नेताहरुको समीकरण सधैं एउटै रहेको देखिंदैन । आज एउटा मोर्चामा रहेका नेता भोलि अर्कैमा पुग्ने गरेका छन् । त्यसैले अहिलेको परिवर्तित समीकरण कुनै पनि बेला फेरिन सक्छ । त्यस अर्थमा बुझ्ने हो भने ओलीमा आएको बदलाव अर्थपुर्ण हुन सक्छ ।

कमजोर अवस्थामा रहेका ओलीसँग सत्ताको ठूलो शक्ति छ, त्यसैले कुनै पनि बेला नेताको समीकरण बदलिन सक्छ–डा. केसीको बुझाई छ । प्रचण्ड पनि यस मामलामा खुँखार छन्, उनैले फेरि ओलीसँग नै हिमचिम बढाएर नयाँ खाले समीकरण बनाउन सक्छन्– केसी भन्छन् । कुनै सैद्धान्तिक अडान नभएका वाम नेताहरु सत्ता स्वार्थमा फस्ने चरित्रका भएकाले समय परिवेश अनुसार समीकरणमा बदलाव आउन सक्ने ठम्याई उनको छ ।

तर जे भएपनि अहिले चाहिं ओलीमा नसोचेको परिर्वतन देखा परेको छ । सधैं अरुलाई सुनाउने उनको बानी फेरिएको छ । अरुका कुरा सुन्न थालेका छन् । साथै हिजो आफैंले बोलीचाली नै बन्द गरेका नेताहरुलाई बालुवाटारमा बोलाएर घण्टौं भलाकुसारी गर्न तयार भएका छन् । ओलीको यो अवतार नौलो लागेपनि राजनीतिका कुशल खेलाडीको परिचय दिन उनी सफल भएका छन् । यो रफ्तारले कुन तह र हदसम्मको निरन्तरता पाउने हो, त्यो भने आगामी दिनमा विकसित हुने घटनाक्रमले निर्धारण गर्ने हो ।