उपचारका क्रममा पूर्व सचिव कार्की पत्नीकाे मृत्यु, घटनाबारे प्रहरी अनुसन्धान जारी

२७ माघ, काठमाडौं । नेपाल सरकारका पूर्व सचिव अर्जुन कार्कीकी पत्नी मुनाकाे उपचारकाे क्रममा मृत्यु भएकाे छ । गम्भिर अवस्थामा फेला परेकी उनलाई उपचारकाे लागि प्रहरीले स्टार अस्पताल पुर्याएकाे थियाे । ललितपुरस्थित घरमै गम्भीर घाइते अवस्थामा फेला परेकी उनकाे अस्पतालमा मृत्यु भएको हाे ।

आज बिहान घरमा काम गर्ने एक जना कामदार विजय चौधरीले मुनाको हत्या प्रयास गरेको हुन सक्ने अनुमान गरिएको छ । घटना विवरण अनुसार सानेपा स्थित आफ्नै घरको भान्छा कोठामा भेटिएकी उनको टाउकोमा गम्भिर चोट लागेको भेटिएको थियो । रगतले लतपतिएको अवस्थामा उनलाई अचेत अवस्थामा फेलापारिएको प्रहरीले जनाएको छ । घटना किन र कसले कुन उद्देश्यले घटायो भन्नेबारे अहिले नै पुष्टि भैसकेको छैन ।

यस्तै कामदार चौधरी भने घरमै झुण्डिएको अवस्थामा मृत फेला परेका छन् । जिल्ला प्रहरी कार्यालय ललितपुरका प्रमुख एसएसपी टेकप्रसाद राईले घटनको पुष्टी गरेका छन् ।

एसएसपी राईका अनुसार, यस सम्बन्धमा थप अनुसन्धान भइरहेको छ । पूर्व सचिव कार्की विहान पशुपतिनाथको दर्शन गर्न गएका थिए । उनी घर फर्कदा यस्तो दुखान्त घटना देखेका थिए । यस सम्वन्धमा थप अनुसन्धान भइरहेको प्रहरीले जनाएको छ ।

अहिले घटनास्थलमा फरेन्सिक विज्ञको टोलीले कार्य थालेको छ । घटनामा कसले र किन गरायो भन्ने अहिलेसम्म खुलेको छैन । घटनामा प्रयोग भएको हतियारबारे पनि प्रहरीले खुलाएको छैन । घटनाबारे प्रहरी अनुसन्धान भने जारी रहेकाे छ ।