सफाई पाएसँगै रिहाइ प्रक्रियामा महरा

५ फागुन, काठमाडौं । जर्वजस्ती करणीको उद्योग गरेको आरोपमा थुनामा रहेका पूर्वसभामुख कृष्णबहादुर महरालाई रिहाइ प्रक्रिया लागि डिल्लीबजार जेलतर्फ लगिएको छ । जिल्ला अदालत काठमाडौंले सफाइ दिएसँगै उनको रिहाइ प्रक्रिया सुरु भएको छ । पुर्पक्षका लागि विगत ४ महिनादेखि थुनामा रहेका महरालाई रिहाइको प्रक्रिया पूरा गर्न कारागारतर्फ लगिएको हो ।

अदालतका श्रेस्तेदार आनन्दप्रसाद श्रेष्ठका अनुसार, जिल्ला न्यायधीश अमरराज पौडेलको इजलाशले महरालाई सफाई दिएको हो । संसद् सचिवालयकी महिला कर्मचारी रोशनी शाहीलाई जवर्जस्ती गरेको आरोपमा महराविरुद्ध मुद्धा दायर भएको थियो ।

त्यसपछि महरालाई थुनामै राखी मुद्धा चलाउने आदेश भए बमोजिम डिल्लीबजारस्थित कारागारमा राखिएको थियो । हिजो दुबै पक्षका वकिलले अबेरसम्म बहसपैरवी गरेका थिए ।

न्यायधीश पौडेलले उक्त मुद्धामा सबै अंग पुगिसके पनि फैसला लेख्न समय लाग्ने भन्दै हेर्दाहेर्दैमा राखेका थिए । सोही बमोजिम आज फैसला आएको हो – श्रेष्तेदार श्रेष्ठले बताए ।