बाँस्कोटालाई ८ वर्ष जेल सजाय हुनसक्छ:- अधिवक्ता केसी

९ फाल्गुण, काठमाडौं । पूर्वसञ्चारमन्त्री गोकुलप्रसाद बाँस्कोटालाई भ्रष्टाचारको कसुरका लागि उद्योग गरेको ठहर भए ८ वर्षसम्म कैद र २५ करोड ४५ लाख रूपैयाँसम्म जरिवाना हुनसक्ने देखिएको छ ।

भ्रष्टाचार निवारण ऐन २०५९ को दफा २१ अनुसार भ्रष्टाचारको सजाय हुने, कसुर गर्ने वा उद्योग गर्नेलाई आधा सजाय हुने व्यवस्था अन्तर्गत उनलाई सो सजाय हुने चर्चित अधिवक्ता गणेश केसीले नेपालबहस डटकमलाई बताए ।

जीटुजी अन्तरगत स्वीस कम्पनीका स्थानीय एजेण्टसँग सेक्युरिटी प्रेस खरिद प्रकरणमा ७४ करोडको कमिशन डिल गरेको अडियो सार्वजनिक भएपछि राजीनामा दिन बाध्य भएका बाँस्कोटाको निजी सचिवालयमा हिजै अख्तियारले छापा मारी कागजात नियन्त्रणमा लिएपछि यो प्रसंग उठेको हो । यदि साच्चै अख्तियारले गम्भीरतापूर्वक छानविन र कारवाही गर्ने हो भने अडियोमा प्राप्त ७४ करोडको ७० प्रतिशत अर्थात् ५१ करोड ९० लाख उनले कमिसन पाउने भएपछि त्यसको आधा अर्थात् २५ करोड ४५ लाख रुपैयाँ जरिवाना हुनसक्ने अधिवक्ता केसीको भनाई छ ।

चर्चित अधिवक्ता केसीका अनुसार भ्रष्टाचार निवारण ऐनको परिच्छेद २ को दफा ३ अनुसार रू १ करोड भन्दा बढी भ्रष्टाचारको कसुर ठहर भए बिगोबमोजिम जरिवाना र ८ देखि १० वर्षसम्म सजाय हुने व्यवस्था छ । ऐनको दफा २१ अनुसारको व्यवस्था बाँस्कोटाको हकमा आकर्षित हुनेछ । त्यो भनेको कुल सजायको आधा हो ।

तर, ऐनको दफा २४ मा भएको थप सजायसम्बन्धी व्यवस्थाका कारण बाँस्कोटाले भ्रष्टाचारको कसुरका लागि उद्योग गरेको ठहर भए थप ३ वर्ष कैद सजाय हुने व्यवस्था रहेको कानुन व्यवसायी गणेश केसीको भनाई छ ।