गोकुलप्रति नेकपाकै नेता बढी आक्रोशित

१० फागुन, काठमाडौं । सेक्युरिटी प्रिन्टिङ प्रेस खरिद प्रकरणमा विदेशी कम्पनीका एजेन्टसँग कमिसनका लागि मोलमोलाई गर्ने निवर्तमान सञ्चार तथा सूचना प्रविधि मन्त्री गोकुलप्रसाद बाँस्कोटाका लागि आगामी दिन ज्यादै कष्टप्रद हुने देखिएको छ ।

विपक्षी दल भन्दा आफ्नै दल नेपाल कम्युनिष्ट पार्टी (नेकपा)का नेताहरुको तारो बनेका छन् अहिले बाँस्कोटा । प्रमुख प्रतिपक्षी दल नेपाली कांग्रेसले बाँस्कोटा विरुद्ध आन्दोलन सुरु गरेको छ । संसद् र सडक आन्दोलनलाई बल पु¥याउन अहिले नेकपाकै कतिपय नेता कार्यकर्ता अघि सरेका छन् ।

प्रधानमन्त्री खड्गप्रसाद ओलीको निकट सम्बन्ध बनाएका बाँस्कोटा शक्तिशाली बनेपछि पार्टी भित्रका आफूभन्दा वरिष्ठ नेताहरुप्रति अत्यन्तै असहिष्णु र अभद्र भएको ठम्याई धेरैको रहेको छ । खासगरी पूर्व माओवादीप्रतिको उनको धारणा धेरै नै नकारात्मक रहेको देखिएको हो । त्यसैले अब बाँस्कोटाविरुद्ध पूर्व माओवादी पक्ष अनुदार हुने वातावरण तयार भएको छ ।
पूर्व माओवादीको सोच र अवधारणालाई माधवकुमार नेपाल र झलनाथ खनाल पक्षले समेत सघाउ पु¥याउने अवस्था रहेको एकजना पोलिटब्युरो सदस्यले बताए । गोकुल प्रवृत्तिले पार्टी र सरकार दुबैलाई ठूलो क्षति पुगेकाले यो प्रकरण त्यतिकै सेलाउने अवस्था हुने छैन – उनी भन्छन् प्रमुख प्रतिपक्षी दलले यो विषयमा खुट्टा कमायो भने हामी आफैं अघि सर्ने अवस्था छ ।

गोकुललाई कानूनी दायरामा ल्याउने र हदैसम्मको सजाय गराउन सकिएन भने अबको चुनावमा हामीले मुख नदेखाए हुन्छ – उनी भन्छन् यो गम्भिर विषयलाई पूर्व माओवादी पक्षले मात्र होइन हामी पूर्व एमाले पक्षले समेत परिपक्वता देखाउने बेला हो । विषयको गाम्भिर्यता नबुझ्ने हो भने यो स्वयं प्रधानमन्त्रीप्रति सोझिएको तरबार हो, त्यसैले अबिलम्ब गोकुल प्रकरणमा निष्पक्ष छानविन समिति बनाएर अगाडि बढ्नुको विकल्प छैन ।

पार्टी भित्रबाटै गोकुलप्रति नकारात्मक धारणा राख्नेको उल्लेख्य संख्या भएकाले पनि यो प्रकरणमा प्रधानमन्त्री ओलीको सद्भावले खासै काम गर्ने अवस्था देखिंदैन । उनी प्रति पूर्व एमालेका कुनै नेताले पनि भित्री हृदयबाट सहानुभुति देखाउने अवस्था बनेकाे छैन । आज बाँस्कोटाकाे यो अवस्था निर्माण हुनुमा उनी नै बढी जिम्मेवार छन् । सत्तामा रहँदा जसरी आफु इतरका व्यक्तिलाई उनले रुष्ट र चोटिलो व्यवहार गरेका थिए त्याे नै अबका दिनमा उनले पाउने भएका छन् ।

पदमा रहँदा गोकुलले देखाएको व्यबहार नेकपाकै धेरै नेतालाई पचेको थिएन । त्यसैले पनि गोकुलप्रति विपक्षी भन्दा आफ्नै पार्टीका नेता कार्यकर्ताको आक्रोश बढी देखिएको छ । यसै सन्दर्भमा छलफल गर्न अहिले साँझ सत्तारुढ नेकपाको सचिवालय बैठक बस्दै छ । बैठकले गोकुल प्रकरणबारे गम्भिरतापूर्वक छलफल गरी मन्त्रिमण्डलमा हेरफेर गर्न प्रधानमन्त्रीलाई सुझाव दिने बुझिएको छ ।

बैठकमा एमसीसी प्रकरणबारे पनि ठोस निर्णय निकाल्न प्रयास गरिने बताइएको छ । अलग धारका नेता भीम रावलसहितको कार्यदलले एमसीसी बारे अध्ययन गरेर हिजो साँझ नै अध्यक्षद्वयलाई प्रतिवेदन बुझाइ सककेको छ ।