दुर्लभ बन्यजन्तु रेड पाण्डाको छालासहित ४ जना पक्राउ

१३ फागुन, काठमाडौं । काठमाडौं स्थित कपन खरिबोटबाट दुर्लभ बन्यजन्तु रेड पाण्डाको छालासहित चार जना पक्राउ परेका छन् । सिन्धुली तिनपाटन गा.पा वडा नं. ४ बालाजोर घर भई कपन पयैयुटार बस्दै आएका ३९ वर्षका सुर्यबहादुर भुजेल, धादिङ धुनिबेसी न.पा वडा नं.७ झाप्रे घर भई हाल ललितपुर ढोलाहिटी बस्दै आएका वर्ष ४० का सुकबहादुर लामा, कास्की मादी गा.पा, वडा नं.८ तारकाङ घर भई हाल काठमाडौं गौशाला बस्ने वर्ष ३७ का युवराज सापकोटा र काठमाडौं बुढानिलकण्ठ नगरपालिका १३ घर भएका ४० वर्षिया कमला तामाङलाई प्रहरीले नियन्त्रणमा लिएको छ ।

उल्लेखित व्यक्तीहरुले रेड पाण्डाको छाला अबैध रुपमा ओसारपसार गर्ने गरेको प्रहरीले जनाएको छ । उनलीहरु यस्तो कार्यमा संम्लग्न रहेको र दुर्लभ रेड पाण्डा लगायतका दुर्लभ बन्यजन्तुका विभिन्न अंगहरुको अबैध बिक्री गर्ने गरेको भन्ने गोप्य सुचनाको आधारमा उनीहरुलाई प्रहरीले पक्राउ गरेको हो ।

प्रहरीले शरीर खानतलासी गर्ने क्रममा सुर्यबहादुर भुजेलले पछाडी बोकेको कालो रंगको ब्याग भित्र निलो प्लाष्टिकमा बेरिएको अबस्थामा दुर्लभ बन्यजन्तु रेड पाण्डाको छाला १ थान फेला पारी पक्राउ गरेको जनाएको छ । आबश्यक कारवाहीको लागि जिल्ला बन कार्यालय हात्तीसार काठमाडौंमा पठाइएको प्रहरी उपरिक्षक मुकेशकुमार सिंहले जनाएका छन् ।