स्रोत नखुलेको पैसा झोलामा बोक्दै हुनुहुन्छ ? होस् गर्नुस है, प्रहरीको फन्दामा पर्नुहोला !

१४ फागुन, पर्सा । कतै तपाई स्रोत नखुलेको पैसा झोलामा बोकेर हिडिरहनु भएको त छैन् ? यदि छ भने होस् गनुर्स है ! नत्र प्रहरीको फन्दामा पर्नुहोला । यस्तै घटना हिजो बीरगञ्जमा घटेको छ ।

उनीहरुलाई वीरगंज महानगरपालिका-१० आदर्शनगरस्थित सडकबाट स्रोत नखुलेको रकम १९ लाख ७१ हजार रुपैयाँ सहित २ जनालाई सोमबार दिउँसो पसौ प्रहरीले पक्राउ गरेको छ । पक्राउ पर्नेहरुमा वीरगंज महानगरपालिका-१६ बस्नेहरु ४१ वर्षीय संजय कुमार साह र ३० वर्षीय जयलाल महतो रहेका छन् । वडा प्रहरी कार्यालय विर्ता पर्साबाट खटिएको प्रहरीले बा.४८ प ६५९७ नम्बरको मोटरसाइकललाई जाँच गर्ने क्रममा मोटरसाइकलमा सवार साहको साथबाट ९ लाख ७१ हजार रुपैयाँ र महतोको साथबाट १० लाख रुपैयाँसहित उनीहरुलाई पक्राउ गरेको हो ।

यसैगरी पर्सा, वीरगंज महानगरपालिका-१६ स्थित ईनवा गाउँ जाने बाटोबाट स्रोत नखुलेको नगद ७ लाख रुपैयाँसहित २ जनालाई मंगलबार प्रहरीले पक्राउ गरेको छ । पक्राउ पर्नेहरुमा भारत रक्सौल डुमरियाका ३५ वर्षीय विजयकुमार ठाकुर र पर्सा वीरगंज महानगरपालिका-१६ नगवा बस्ने ३१ वर्षीय राजुकुमार कलवार रहेका छन् ।

उक्त स्थानमा जिल्ला प्रहरी कार्यालय पर्साबाट खटिएको प्रहरीले सवारी साधन जाँच गर्ने क्रममा बिआर ०५ एए ७२५५ नम्बरको मोटरसाइकल चालक ठाकुरको साथबाट नगद ४ लाख रुपैयाँ र बिआर ०५ डि ५०१८ नम्बरको मोटरसाइकल चालक कलवारको साथबाट नगद ३ लाख रुपैयाँ फेला पारी दुबै जनालाई पक्राउ गरेको हो ।

पक्राउ परेका सबै जना उपर अवैध वित्तिय कारोवार (हुण्डी) शीर्षक मुद्दामा आवश्यक अनुसन्धान भइरहेको जिल्ला प्रहरी कार्यालय पर्साले जनाएको छ ।