बामदेव राष्ट्रियसभामा आउन राजी भएपछि ओलीलाई राजनीतिक लाभ

१४ फाल्गुण, काठमाडौं । सत्ताधारी नेकपाको आज बिहान बसेको सचिवालय बैठकले उपाध्यक्ष बामदेव गौतमलाई राष्ट्रिय सभामा नियुक्तिका लागि सरकारलाई सिफारिश गर्ने निर्णय गरेको छ । साथै, यसअघिको सचिवालय बैठकले गठन गरेको भनिएको विवादास्पद संविधान संशोधन कार्यदल खारेज गरेको छ ।

राष्ट्रिय राजनीतिमा महत्वपूर्ण अर्थ राख्ने यी दुबै निर्णयले देशको आगामी राजनीतिक यात्रा समेत निर्धारण गर्नेछ । आगामी फागुन २० गतेदेखि पदमुक्त हुन लागेका अर्थमन्त्री डा. युवराज खतिवडाको ठाउँमा लैजान प्रधानमन्त्री केपी ओलीलाई सचिवालय बैठकले आग्रह गरेको पार्टी प्रवक्ता नारायणकाजी श्रेष्ठले बताए ।

गौतमलाई राष्ट्रियसभामा लैजान सचिवालयले सिफारिश गरेपछि अर्थमन्त्री डा. खतिवडाको जागिर धरापमा परेको छ ।नेपालको संविधान अनुसार मन्त्री बन्न कुनैपनि सदनको सदस्य अर्थात सांसद हुनु अनिवार्य छ ।

उपाध्यक्ष गौतमलाई प्रधानमन्त्रीको कोटाबाट मनोनयन गर्न राष्ट्रपति समक्ष सिफारिश गरिने छ । साथै, संविधान संशोधन कार्यदल खारेज भएपछि गौतमको प्रधानमन्त्री बन्ने चाहना र आकांक्षा तत्कालका लागि भने टरेको छ ।

यो निर्णयले प्रधानमन्त्री ओलीलाई राजनीतिक रुपमा ठूलो प्राप्ति भएको बुझाई कतिपयको रहेको छ । गौतमलाई आफ्नो मन्त्रिमण्डलमा ल्याउन ओली सफल भएभने उनी विरुद्धको मोर्चाबन्दी मत्थर हुने धेरैको बुझाई छ ।