भाजपा नेता बरुण गान्धी सपरिवार नेपाल भ्रमणमा, दक्षिणकाली र पशुपतिमा विशेष पुजा

१४ फाल्गुण, काठमाडौं । भारतीय राजनीतिमा बिपक्षी कांग्रेस आईका अध्यक्ष राहुल गान्धीका भाई एवं सत्तारुढ भाजपाका नेता बरुण गान्धी सुटुक्क दुई दिने नेपाल भ्रमण सकेर फर्केका छन् । हिजो दिउँसो अपरान्ह भारतीय विमानबाट सपरिवार काठमाडौं आएका उनी आज नयाँ दिल्ली फर्किएका हुन् । उनी संजय गान्धीका सुपुत्र हुन् ।

भारतीय नेताहरु नेपाल भ्रमणमा आउँदा निकै चर्चा परिचर्चा हुने गरेपनि बरुण गान्धीको भ्रमण बारे नेपाली मिडियाले कुनै जानकारी नै पाएनन् । उनी बौद्धस्थित पाँचतारे होटल हायातमा बसेका थिए । आएको साँझपख बसन्तपुर दरबार अवलोकन गरेका गान्धीले आज बिहानै प्रसिद्ध तीर्थस्थल दक्षिणकाली मन्दिर पुगेर दर्शन तथा पुजाअर्चना गरेको बताइन्छ ।

त्यसलगत्तै उनी सपरिवार पशुपतिनाथ मन्दिर पुगेर विशेष पुजा गरेका थिए । सो पुजाका बेला पशुपति क्षेत्र विकास समितिका सदस्यसचिव डा. प्रदीप ढकालले उनको स्वागत तथा सत्कार गरेका थिए ।

आफ्नो विशुद्ध धार्मिक एवं पारिवारिक भ्रमण रहेको बताउदै नेता गान्धीले आफुले नेपालका कुनै नेता तथा शुभचिन्तकहरुलाई नभेटेको पशुपति मन्दिर परिसरमा उपस्थित चर्चित अधिवक्ता गणेश केसीसँगको कुराकानीमा बताएका थिए ।