बाँस्कोटामाथि कारबाही गर : ट्रान्सपरेन्सी नेपाल

१६ फागुन, काठमाडौं । सेक्युरिटी प्रेस खरिद प्रकरणमा दोषी भनिएका तत्कालिन सञ्चार तथा सूचना प्रविधि मन्त्री गोकुलप्रसाद बाँस्कोटालाई जोगाउने नियतले प्रधानमन्त्री केपी ओलीका अभिव्यक्ति सार्वजनिक भएसँगै भ्रष्टाचारविरोधी आन्दोलनको अगुवाई गर्ने ट्रान्सपरेन्सी नेपालले चासो देखाएको छ ।

ट्रान्सपरेन्सीको नेपाल च्याप्टरले तत्कालिन मन्त्री तथा त्यस प्रकरणका सम्पूर्ण मतियारलाई तत्काल छानबीनको दायरामा ल्याई कानूनी प्रकृया अघि बढाउन माग गरिएको छ । ट्रान्सपरेन्सी नेपालका च्याप्टर प्रमुख खेमराज रेग्मीले आज एक प्रेस विज्ञप्ति जारी गर्दै सो प्रकरणमा मुछिएका तत्कालिन मन्त्री लगायत सबै मतियारमाथि सम्वन्धित निकायले कारबाही गर्न माग गरिएको छ ।

विज्ञप्तिमा भनिएको छ – भ्रष्टाचार उद्योग प्रकरणमा संलग्न तत्कालिन मन्त्रीसहित अन्य मतियारहरुलाई कुनै पनि शक्ति केन्द्रको दवाव र प्रभावमा नपरी निष्पक्ष तथा निर्भिकतापूर्वक यथाशीघ्र कारबाही प्रकृया अगाडि बढाउन अख्तियार दुरुपयोग अनुसन्धान आयोग लगायत सम्बन्धित निकायहरुको गम्भिर ध्यान आकर्षण गराउन चाहन्छौं ।

प्रधानमन्त्री ओलीले हिजो एक सार्वजनिक कार्यक्रममा बाँस्कोटाको अडियो टेप सार्वजनिक गर्ने मानिस गलत भएकाले अपराध पुष्टी नभएको भनी बचाउ गरेका थिए । साथै आजै मात्र आरोपित बाँस्कोटाले अडियो टेप सार्वजनिक गर्ने विजयप्रकाश मिश्र विरुद्ध काठमाडौं जिल्ला अदालतमा गाली बेइज्जती मुद्धा दायर गरेका छन् ।