राष्ट्रिय इञ्जिनीयर सम्मेलन : स्मार्ट पूर्वाधारका विषयमा छलफल हुँदै

१७ फागुन काठमाडौं । ‘स्मार्ट’ पूर्वाधार निर्माणमा सरकारलाई आवश्यक सुझाव दिने उद्देश्यले आगामी साता राजधानीमा १६औँ राष्ट्रिय इञ्जिनीयर सम्मेलन हुँदैछ ।

नेपाल इञ्जिनीयर्स एशोसिएशनको आयोजनामा हुने सो सम्मेलनले इञ्जिनीयरहरुका बीचमा छलफल गरेर पूर्वाधारको आवश्यकता पहिल्याउनेछ । समृद्ध मुलुक निर्माणका लागि आवश्यक पर्ने नीति, योजना निर्माण गर्न सम्मलेनमार्फत सरकारलाई सुझाव दिइने एशोसिएशनका उपमहासचिव कपिल आचार्यले जानकारी दिए।

स्वदेश तथा विदेशका झण्डै दुई हजार इञ्जिनीयर सहभागी हुने सो सम्मेलनमा ‘टेक्नो–इकोनोमी’ सत्रमा ‘राष्ट्रिय समृद्धिका लागि ‘स्मार्ट’ पूर्वाधार : नीति, योजना र कार्यान्वयन’ विषयमा बृहत् छलफल हुनेछ । उक्त सत्रको मुख्य वक्ताका रुपमा पूर्वप्रधानमन्त्री डा बाबुराम भट्टराई रहेका छन् ।

सम्मेलनका क्रममा समृद्ध मुलुक निर्माणमा कस्तो पूर्वाधार निर्माण गर्ने भन्ने विषयमा छलफल हुने उपमहासचिव आचार्यले जानकारी दिए । यही फागुन २१ देखि २३ सम्म हुने सो सम्मेलनले काठमाडौं घोषणापत्र जारी गर्नेछ ।

सम्मेलनको सन्दर्भ पारेर आज एशोसिएशनले म्याराथन प्रतियोगिताको आयोजना गरेको थियो । सो कार्यक्रमको उद्घाटन गर्दै शहरी विकास राज्यमन्त्री रामवीर मानन्धरले समृद्ध नेपाल निर्माणमा इञ्जिनीयरहरुको भूमिका अतुलनीय रहेको बताए ।