६ सचिवको सरुवा तथा बढुवा, चीनका राजदुत पौड्याललाई फिर्ता बोलाइयो

१९ फागुन, काठमाडौं । प्रचण्डको कोटामा चीनको राजदुत नियुक्त भएका लीलामणि पौड्याललाई फिर्ता बोलाउदै केपी ओली सरकारले नेकपाका नेता महेन्द्रबहादुर पाण्डेलाई चीनको राजदुतमा प्रस्ताव गरेको छ । मृगौला प्रत्यारोपण अघि हिजो साँझ आकस्मिक रुपमा बोलाइएको मन्त्रिपरिषद बैठकले पूर्व मुख्यसचिव पौड्याललाई समय अगावै फिर्ता बोलाउने निर्णय गरेको हो ।

त्यस्तै सरकारले ६ जना सचिवको सरुवा तथा २ जनालाई बढुवा गर्ने निर्णय पनि गरेको छ । मन्त्रिपरिषदको हिजो साँझ बसेको आकस्मिक बैठकले कलकत्ताको महाबाणिज्यदुत रहेका सहसचिव एकनारायण अर्याललाई सचिवमा बढुवा गर्दै काठमाडौं महानगरपालिकामा पदस्थापन गरेको छ ।

यस्तै महानगरका कार्यकारी अधिकृत रहेका केदार न्यौपानेलाई भूमिसुधारमा सरुवा गरिएको छ । भूमिसुधारका सूर्य गौतमलाई संघीय मामिला र त्यहाँका सचिव यादव कोइरालालाई स्वास्थ्य मन्त्रालयमा सरुवा गरिएको छ ।

स्वास्थ्य मन्त्रालयका सचिव खगराज बराललाई भने उपराष्ट्रपतिको कार्यालयमा थन्काइएको छ । यस्तै अर्थमन्त्रालयका सहसचिव रामशरण पुडासैनीलाई कामू दिएर राजश्व सचिवमा बढुवा गरिएको छ ।