हेभी सवारी चालक तालिम सम्पन्न, ४८ प्रशिक्षार्थीहरुको सहभागिता

२९ फागुन, काठमाडौं ।  राष्ट्रिय प्रहरी प्रशिक्षण प्रतिष्ठान महाराजगंजको तत्वावधानमा प्रहरी प्रधान कार्यालय सवारी महाशाखामा संचालित १०औं समूहको हेभी सवारी चालक तालिम बिहीबार सोही महाशाखामा आयोजित एक कार्यक्रमबीच समापन भएको छ ।

तालिम समापनका अवसरमा सोही महाशाखाका प्रमुख प्रहरी वरिष्ठ उपरीक्षक ई. नरोत्तम लाल प्रधानले प्रशिक्षार्थीहरुलाई प्रमाणपत्र वितरण गर्दै संगठनलाई आवश्यक पर्ने दक्ष हेभी सवारी चालकहरुको पूर्ति गर्नु तालिमको उद्देश्य रहेको बताए ।समयसापेक्ष रुपमा सवारी साधनमा विकास हुने नयाँ प्रविधियुक्त हेभी सवारी साधनहरुको बारेमा दक्षता अभिवृद्धि गरी कुशल चालक उत्पादन गर्न तालिमले सहयोग पुर्‍याउने विश्वास उनले व्यक्त गरे ।

कार्यक्रममा प्रहरी नायव उपरीक्षक ई.कमलेन्द्र लाल कर्णले तालिम सम्वन्धि प्रतिवेदन प्रस्तुत गर्दै गत माघ २१ गतेदेखि संचालित ३० दिन कार्यअवधिको उक्त तालिममा प्रहरी हवल्दार ४ जना र प्रहरी जवान ४४ जना गरी जम्मा ४८ जना प्रशिक्षार्थीहरुको सहभागिता रहेको जानकारी दिए।