गैरीधाराबाट दिउँसै ल्यापटपसहित २ लाख चोरी

२ चैत काठमाडौं । काठमाडौं महानगरपालिका-१ गैरीधारा डेरा गरी बस्ने चिनियाँ नागरिक २७ वर्षीय याङ्चावाको कोठाबाट नगद २० हजार रुपैयाँ र ल्यापटप १ थान समेत गरी करिब २ लाख ७० हजार रुपैयाँ बराबरको धनमाल शनिबार दिउँसो चोरी भएको छ । चोरीमा संलग्न व्यक्तिहरुको प्रहरीले खोजी गर्नुका साथै यस सम्बन्धमा आवश्यक अनुसन्धान गरिरहेको छ ।

उता, मकवानपुरको हेडौंडा उपमहानगरपालिका-१९ बाट नवलपरासी गैंडाकोट नगरपालिका-५ बस्ने ३५ वर्षीय कृष्ण रसैलीलाई अवैध रुपमा लिएर हिँडेको चाँदीका विभिन्न तयारी गहना करिब ३ किलो ६० ग्राम सहित शनिबार दिउँसो प्रहरीले पक्राउ गरेको छ ।

उक्त ठाउँमा शंकास्पद रुपमा हिँडिरहेका कृष्णको साथबाट ईलाका प्रहरी कार्यालय नेवारपानीबाट खटिएको प्रहरीले जाँच गर्ने क्रममा उक्त चाँदी फेला पारी पक्राउ गरेको हो । यस सम्बन्धमा प्रहरीले थप अनुसन्धान गरिरहेको छ ।

यता, काठमाडौं महानगरपालिका-१ दरबारमार्गबाट सिन्धुपाल्चोक बाह्रबिसे नगरपालिका-२ घर भई हाल भक्तपुर दुवाकोट बस्ने २५ वर्षीय भिम बहादुर तामाङलाई YUEPENG GOLD 1 KILO FINE GOLD 999.9Y.185267 लेखिएको सुन जस्तो देखिने पहेलो धातु १ थान सहित शनिबार दिउँसो प्रहरीले पक्राउ गरेको छ । सोही ठाउँस्थित शंकास्पद अवस्थामा हिँडिरहेका तामाङको साथमा उक्त धातु फेला पारी प्रहरीले पक्राउ गरेको हो । यस सम्बन्धमा प्रहरीले थप अनुसन्धान गरिरहेको छ ।