गोदाममा लुकाएको ६ लाख सर्जिकल मास्क बरामद

३ चैत, काठमाडौं । प्रहरीले काठमाडौंको सतुंगलबाट करिब ६ लाख थान सर्जिकल मास्क बरामद भएको छ । चन्द्रागिरि नगरपालिका–१० विष्णुदेवीस्थित एक गोदाममा राखिएका मास्क प्रहरीले बरामद गरेको हो ।

यसअघि कपनबाट १ लाख ६८ हजार थान र डल्लुबाट ७८ हजार थान मास्क बरामद भएको थियो । शनिबार यता काठमाडौंबाट आठ लाख ४० हजार थान मास्क प्रहरीले बरामद गरिसकेको छ ।

आइतबार साँझ सतुंगलका रोहित श्रेष्ठको घरको गोदाममा लुकाएर राखिएको मास्क भेटिएपछि स्थानीय प्रशासनले सिलबन्दी गरेको थियो । सोमबार बिहान खोलेर गणना गर्दा १७५ वटा बोरामा ६ लाख बढी मास्क रहेको थाहा भएको थियो ।

चीनबाट फैलिएको कोरोना भाइरसले विश्वव्यापी रुपमा महामारी लिन थालेपछि नेपालमा मास्कको कालोबजारी सुरु भएको हो । सहज तरिकाले पाइने मेडिकल मास्क कोरोनाको बाहानामा कालोबजारी हुन थालेपछि अहिले अनुगमनलाई तिव्र बनाइएको छ ।