सरकारले बरामद गरेको १० लाख मास्क साझा औषधि पसलबाट बेच्ने 

३ चैत, काठमाडौं । कोरोना भाइरसले विश्वव्यापी रुपमा महामारी रुप लिएपछि कालोबजारी गरी लुकाएका राखेका १० लाख मास्क प्रहरीले बरामद गरेको छ । कोरोना भाइरसको जोखिम बढेसँगै मास्कको माग बढ्दो छ । तर चीनबाट आपूर्ति रोकिएको छ भने भएका मास्कमा कालोबजारी भइरहेको छ ।

४ र ५ रुपैयाँमा पाइने मास्कलाई ५० रुपैयाँसम्म लिन थालेपछि प्रहरीले सर्च अपरेसन चलाएर १० लाख मास्क बरामद गरेको हो । प्रहरीले सर्च अपरेसन गरी बरामद गरेको मास्कहरुलाई सरकारले साझा औषधि पसलबाट बेच्ने तयारी गरेको छ । प्रहरीले चैत २ गते कपनको मिलन चोकबाट १ लाख ६८ हजार थान मास्कसहित ५ जनालाई पक्राउ गरेको थियो ।

उनीहरुसँग सोधपुछको क्रममा काठमाडौं महानगरपालिका १० विष्णुमति पुलस्थित रोहित श्रेष्ठको घर भाडामा लिई राखेको आरडीजी सप्लायर्स कम्पनीको गाेदामबाट ८ लाख ४० हजार थान मास्क बरामद गरिएको महानगरीय प्रहरी परिसरले जानकारी दिएको छ । यो समूहबाट अहिलेसम्म १० लाख ८ हजार थान मास्क बरामद भएको प्रहरीले जनाएको छ ।

प्रहरीका अनुसार मास्कमा कालोबजारी गरेको अभियोगमा पक्राउ परेकालाई प्रक्रिया अनुसार मुद्दा चलाउने तर बरामद भएको वस्तु तत्काल बजारमा पठाउन लिखित निर्देशन नै दिने तयारी भइरहेको छ भने बरामद भएका मास्कहरु साझा औषधि पसलबाट बिक्री गर्ने तयारी सरकारले गरेको छ ।

विश्वमा कोरोना भाइरसको सन्त्रास बढेसँगै मास्कमा कालोबजारी मौलाउँदै गएको छ । प्रहरीले पछिल्लो दिनमा मास्कसहित व्यापारीहरुलाई पक्राउ गर्न थालेको छ । प्रहरीले सोमबार सतुङगल र कपनबाट गरि १० लाख ४० हजार थान मास्क बरामद गरेको हाे ।

प्रहरीले गोप्य सुचनाका आधारमा उक्त मास्कसहित ७ जनालाई पक्राउ गरिएको काठमाडौं प्रहरी परीसरले जनाएको छ ।प्रहरीका अनुसार आइतबार बढी मूल्यमा बिक्री गरेर लैजादै गरेको अवस्थामा सोमबार बिहान महानगरीय प्रहरी वृत्त थानकोटबाट खटिएको प्रहरीको टोलीले आरडीजी सप्लायर्सका सञ्चालक सुरज गोयल र सुवास महेश्वरी गोयललाई पक्राउ गरेको हो ।