काठमाडौं महानगरलाई सुन्दर बनाउन प्रभु बैंकले सहयोग गर्ने

६ चैत्र, काठमाडौं । प्रभु बैंक लिमिटेड र काठमाडौं महानगरपालिका बीच सुन्दर महानगर बनाउने सम्झौता सम्पन्न भएको छ । सो सम्झौता अनुसार काठमाडौं महानगरपालिकाको जमल तथा रत्नपार्क–बागबजारस्थित आकाशे पुलमुनिको ट्राफिक आइल्याण्ड र तीनधारा संस्कृत पाठशाला अगाडिको ट्राफिक आइल्याण्डमा हरियाली बगैंचा र फाउण्टेन निर्माण गर्ने, मर्मत संहार गर्ने-रेखदेख गर्ने, सोको संचालन तथा शहरी सौन्दर्यकरण कामका लागि सम्झौता सम्पन्न भएको हो ।

काठमाडौं महानगरपालिकाका मेयर बिद्यासुन्दर शाक्यको उपस्थितिमा प्रभु बैंकका तर्फबाट प्रमुख कार्यकारी अधिकृत अशोक शेरचन तथा काठमाडौं महानगरपालिकाका तर्फबाट सहसचिव राजेश्वर ज्ञवालीले उक्त सम्झौता पत्रमा हस्ताक्षर गरेका छन् । संस्थागत सामाजिक उत्तरदायित्व अन्तरगत उक्त कार्य गर्न लागेको बैंकले जानकारी दिएको छ ।

नेपालभर २०८ शाखा सञ्जाल, ४६ एक्सटेन्सन काउन्टर, १७ शाखारहित बैंकिङ्ग सेवा तथा १५८ एटीएम आउटलेट रहेको प्रभु बैंकले संस्थागत सामाजिक उत्तरदायित्वमा उल्लेख्य योगदानका साथै आफ्ना ग्राहकहरुलाई अत्याधुनिक र विश्वसनीय सेवा प्रदान गर्दै आएको छ ।