पाँचौं संक्रमित फेला बेल्जियमबाट आएकी युवती

१५ चैत्र, काठमाडौं । आज थप एकजनामा कोरोना भाइरस संक्रमण भएको पुष्टी गरिएको छ । बाग्लुङ घर भएकी २२ बर्यीया ती युवती गत चैत ४ गते कतारको दोहा हुँदै नेपाल आएकी थिइन् । अब नेपालमा कोरोना भाइरसबाट संक्रमितको संख्या पाँच पुगेको छ ।

स्वास्थ्य तथा जनसंख्या मन्त्रालयमा आज गरिएको नियमित पत्रकार सम्मेलनमा उक्त जानकारी दिइएको हो ।मन्त्रालयका प्रवक्ता डा. विकास देवकोटाले भने – संक्रमित युवती बाग्लुङस्थित आफ्नै घरमा आइसोलेसनमा छिन्, अब हामी उनलाई काठमाडौं ल्याउने तयारी गरिरहेका छौं ।

यसअघि फ्रान्सबाट आएकी १९ वर्षीया युवती पनि सोही विमानमा सवार थिइन् । फ्रान्सबाट आएकी युवतीमा भाइरसको संक्रमण देखिएपछि विमानमा सवार बाँकी १५८ यात्रुको खोजी गरिएको थियो । यसैक्रममा बाग्लुङकी युवती सम्पर्कमा आएकी थिइन् ।

ती युवतीको खकार र रगतको नमूना धौलागिरी अञ्चल अस्पतालमा लिई काठमाडौंस्थित शुक्रराज ट्रपिकल तथा सरुवा रोग अस्पतालमा पठाइएको थियो । परीक्षणपछि आज नै कोरोना भाइरस पोजिटिभ देखिएको थियो ।